El Festival de Cine de Xixón celebra'l Día d'Asturies

La 42 edición del Festival de cine de Xixón entra na so parte final y presenta güei diez curtios a competición dientro del yá tradicional "Día d'Asturies". Xunta ellos, van proyectase tamién otros seis trabayos fuera de concursu. La cita ye a les 8 de la tarde de güei miércoles nos Cines Centro de Xixón

Ente los títulos que compiten esta tarde ta "Adolf 474", na que Ricardo Fernández Peña reproduz, al traviés del testemuñu de los que lu conocieron, la vida d'Adolf, un personaxe que llegó a esti mundu con un cuerpu de 100 años y qu'en cuenta d'avieyar, remocicaba col pasu'l tiempu. Pela so parte "Ego" de Javier González Bernardo, ye una historia metafórica animada por ordenador sobre la tresformación del alma humano. En "Gritar", Carlos Navarro trata'l tema de la falta de comunicación. Otru de los títulos a concursu nesti "Día d'Asturies" ye "Nada personal" d'Elena Tamés que cuenta la hestoria d'un matrimoniu en crisis. Bruno Mateos axunta cine y pintura en "Raya", onde dos pintores esploren les posibilidaes de la perspectiva y del color. El viaxe inciertu d'Iraida Lombardía en "Bon/Boyeur", la muerte de la espontaneidá na observación que Francisco Deborja presenta en "Amáquina", la soledá de Paulino Ibáñez en "La casa vacía" y "Maria Luisa", de Patricia García Quesada, completen la llista de títulos a competición nel Día d'Asturies, nel que tamién va haber un pase especial a cargu d'Amanda Castro y la so cinta "Tierra de guerrilleros", que con guión de Pedro Alberto Marcos, director del centru de TVE n'Asturies, cuenta l'alcuentru fantásticu ente dos figures asturianes de la llucha guerrillera, d'una parte' socialista José Mata Castro y d'otra'l cura sandinista Gaspar García Laviana.Dos personaxes estremaos nel tiempu y nel espaciu pero los dos nacíos na Güeria Carrocera.

El programa del Festival incluye tamién fuera de competición, los curtios "Gigia", d'Antonio Linares; "Los intelectuales", de Rafael Martínez del Pozo; "Maletango", de Pedro Antonio Curto; "Náufragos", d'Imanol Ruiz de Lara y "Nablús, la ciudad fantasma", d'Alberto Arce.

Aparte de les producciones que se presenten güei, esta edición del Festival Internacional de Cine de Xixón ta demostrando que'l cine asturianu ye quien a dir saliendo adulces de la "incubadora" que ye'l Día d'Asturies, y asina nesta edición del certame presentáronse les cintes "Medrana" segunda obra del realizador Juan Luis Ruiz, que va dos años consiguiere un gran ésitu cola presentación del so primer curtiu "Lluvina" y "De la Fuente" obra del tamién periodista y escritor Ramón Lluis Bande. Xunta estos dos documentales, el festival tien na so sección oficial a concursu otru curtiu tamién de tipu documental d'un realizador asturianu, trátase de la cinta "nenyure" de Pablo Rivero, que quier espeyar la crisis económica y social d'una ciudá como ye Mieres

"Medrana" estrenóse esti domingu nel Festival de Cine de Xixón nun pase que contó con públicu abondu, celebrándose n'acabando la proyección un alcuentru col realizador y con Lucía Herrera, una de les protagonistes d'esta película qu'a lo llargo de los sos cerca de 100 minutos quier presentar la crisis del campu asturianu al traviés d'un montaxe qu'amiesta secuencies de los llabores nuna aldea del Conceyu de Ribedeva cola vivencia y les pallabres de la xente del pueblu, too ello baxo la mirada d'un personaxe que pasa pel llugar y que reflexona sobre la esclerosis d'un mediu de vida espeyada na enfermedá real de les persones que s'entrevisten na película, ente los que rescampla'l testimoniu del molineru, que se convierte pola dureza de la so situación personal, enfermu dende va años d'un mal que lu consume y l'estoicismu de les sos pallabres nel auténticu protagonista d'una cinta que, como señalaba'l so director "nun tien una llinia argumental al usu".

D'otra manera, ayeri proyectóse nuna sesión conxunta con "Five" poema visual del iraní Abbas Kiarostami, el documental "De la Fuente" obra de Ramón Lluis Bande que supón un interesante averamientu a la figura de l'activista política asturiana Aida de la Fuente, protagonista real de la Revolución del 34 que se convertió nun personaxe de dimensión mítica pa la izquierda del país. "De la Fuente" cuenta col testemuñu directu de Pilar, la última hermana viva d'Aida.