El Festival Asturies Rock refuérzase na so segunda edición

El Asturies Rock nació nel añu 2004 como rempuesta a la falta d'apoyu que carecíen los grupos asturianos de rock que buscaben un güecu nos escenarios pa dase a conocer. Na primer edición que se celebró cola Sala Tito's de Pravia como escenariu participaron 14 grupos, dellos nuevos dafechu y otros yá con dello d'esperiencia, casu de Mala Reputacion, que dempués consiguieron una nominación na categoría de rock alternativu nos Premios de la Musica de la SGAE.

Pa la edición d'anguaño, que va celebrase esti fin de selmana, el festival dexa Pravia por Xixón, teniendo la Sala Albéniz como centru d'operaciones musicales y de tou tipu, teniendo prevista la organización exhibiciones artístiques y puestos con materiales de tou tipu pa los visitantes. No tocante a la parte musical, los conciertos van tener llugar a partir de les 6 de la tarde tanto del sábadu como del domingu. La entrada pa cada día sueltu ye de 3 euros y l'abonu pa los dos díes cuesta 5. Ente los grupos participantes nesta edición rescampla The Punishers, los más veteranos del cartel. Esti grupu que se declara heriede de Guns and Roses o Mötley Crue, presenta'l so primer LP "Sleazy Warriors". Xunta ellos, Amon Ra, ganadores del Concursu Nacional de Mieres de maquetes y del Concursu de Rock Ciudá d'Uviéu, el grupu xixonés de ska n'asturianu SkontrA, Stigmata y otros comoAprieta´l Kulo, Xplainit y Electric Funeral, toos ellos bandes de rock y otros estilos allegaos como'l metal xunta bandes de reggae como "Ermitaños del Río" procedentes de de Cangues D'Onís.

Asturies Rock llega asina reforciáu a una segunda edición tres de la que la organización, que ta en trámite de llegalización nel rexistru d'asociaciones, cuenta con esparder l'ámbitu d'actuación y programar actividaes y conciertos a lo llargo de tol añu en distintos puntos de la xeografía asturiana

Más información na web del Festival