El Farho Xixón descuélgase del ascensu

El Farho Xixón Baloncestu perdió cuasi toles sos posibilidaes d´entrar nos "play-off" pol ascensu cola derrota que sofrió escontra'l IBB Hoteles Menorca Basket, cola que tendría de ganar por más de venti puntos a Los Barrios el vienres qu'entra y esperar la derrota del Cáceres pa forzar un empate cuádruple. El partíu de los xixoneses foi mui malu y los baleares ganaron por un 57-67. Lo curtio del marcador debióse a los malos porcentaxes de tiru de los dos equipos, pero sobre too de los locales y al desaciertu de los xugadores americanos xixoneses. Asina los asturianos namás llograron en tiros de dos dolce canastes de cuarenta y ún intentos (29%) y en tiros llibres nueve de catorce intentos (64%); tuvieron meyor nos tiros de tres con ocho de ventitrés (35%). L'equipu foriatu tamién foi meyor nel apartáu de los rebotes, llogrando cuarenta y seis (trenta defensivos y selce ofensivos) por trenta y ún de los locales (dieciocho defensivos y trelce ofensivos). L´únicu aspeutu nel que'l Farho Xixón destacó penriba'l contrariu foi nes perdes de balón, con catorce, por ventiún de los visitantes.

El partíu entamó col desaciertu total de los xixoneses y el Menorca Basket llogró poner nel marcador un resultáu de 0-17 que facía albidrar un resultáu escandalosu. El Farho Xixón encestó los sos primeros puntos cuando faltaben 3´45´´ pa finar el cuartu, diben 6´15´´ de partíu, cuando Antxon Iturbe llogró un triple. Hasta entós el partíu foi un despropósitu de los xixoneses, onde tolos xugadores fallaron canastes, en dellos casos perfáciles. La mayor concentración y una defensa mui fuerte de los islleños produxo esi desastre local. El Farho Xixón ameyoró un poco cuando`l so entrenador introduxo nel parqué a Antxon Iturbe, anque`l cuartu finó con separtación tovía mayor del Menorca Basket, diecisite puntos de ventaya, y un marcador de 7-24.

El segundu periodu entamó cola mayor diferencia de tol partíu pa los visitantes, 7-25, dieciocho puntos, dempués d´un tiru llibre tresformáu por Salva Camps. El Farho Xixón reaccionó y amenorgó diferiencies, llogrando dexales a lo cabero'l periodu en cuatro puntos, con un parcial del cuartu de 19-6, pa ello Diego Tobalina fizo dellos cambeos y foron Iturbe, Lledó y Rubén Suárez los que llevaron l'equipu alantre. Amás el Menorca Basket rotó muncho a los sos xugadores. Como datu del mal partíu de los americanos locales tenemos que Tim Young nun llogró los so primeros puntos hasta l'últimu minutu d´esti cuartu con dos tiros llibres.

La reacción xixonesa siguió al entamu del tercer periodu cuando llogró ponese per delantre con un 31-30 a falta de 8´16´´ pa finar el cuartu. Dempués el Menorca Basket afinó la so defensa y llegó a tener diferencies de nueve puntos al so favor. El cuartu pesllóse con seis puntos favoratibles pal equipu foriatu, con un 43-49.

Nel últimu periodu los xixoneses nun ameyoraron y les diferencies nel marcador nun baxaron d´ocho puntos, con ventayes cómodes siempres pal Menorca Basket d'ente diez y trelce puntos, entrándose nel caberu minutu con esa desventaya que namás maquilló un triple de Antxon Iturbe sobre'l pitíu final.

Nel Farho Xixón Baloncestu hai de destacar el partíu fechu por Antxon Iturbe, que foi'l meyor xugador de los xixoneses, (14 puntos, 3 triples de 5 intentos, 7 rebotes, 2 asistencies y 5 faltes personales recibíes), tamién hai de destacar el llabor de Jorge Lledó (14 puntos, 3 rebotes, 1 asistencia y 1 mate). Los americanos locales nun tuvieron al altor d´otres vegaes y asina Keith Waleskowski llogró 8 puntos y 8 rebotes, y Tim Young fizo 6 puntos y 6 rebotes, el so baxu rendimientu nesti partíu foi ún de los aspeutos que llevaron a la so perda, asina como`l perfloxu alcuentru de Xavi Vallmajó, que nun llogró nin un puntu en tol partíu.
Nel IBB Hoteles Menorca Basket destacar a Jorge Llorens (11 puntos, 8 rebotes, 1 asitencia y 2 balones recuperaos), Terrence Stewart (13 puntos, 6 rebotes, 3 asistencies y 1 balón recuperáu) y Chris Moss (9 puntos, 8 rebotes, 1 balón recuperáu), anque`l másimu encestador de los islleños foi Alberto Miguel (14 puntos).


Ficha técnica:


Farho Xixón Baloncestu: Xavi Vallmajó, Saúl Blanco (8), Josep Pacreu (2), Keith Waleskowski (8) y Tim Youg (6). Tamién xugaron: Chus Poves (2), Jorge Lledó (14), Antxon Iturbe (14) y Rubén Suárez (3).

IBB Hoteles Menorca Basket: Patricio Reynés (10), Francisco Sabaté, Terrence Stewart (13), Jorge Llorens (11) y Chris Moss (9). Tamíen xugaron: Salva Camps (1), Alberto Miguel (14), Urko Otegui (6), Mario Fernández (1) y José Manuel Coego (2).

Árbitrios: José Antonio Pagán y Rodrigo Labrac. Nengún de los dos equipos tuvo eliminaos por cinco personales. Partíu televisáu en directu pola canal televisiva Teledeporte. Unes dos mil persones nel Palaciu los Deportes de La Guía.
Parciales per cuartos: 7-24, 19-6, 17-19 y 14-18