El Farho Xixón Baloncestu salvóse nel últimu minutu

El Farho Xixón Baloncestu continúa na Lliga LEB1 tres d'apuntase na Federación Española de Baloncesto cuando faltaben cinco minutos pa que finase`l plazu llegal. y presentando cola inscripción el Xerente del Club, Alberto Suárez Braña, los 36.000 euros d´inscripción y un aval bancariu por importe de 300.000 euros.

El procesu pa llegar a esti feliz desenllaz que va caltener n'Asturies el baloncestu d'alta competición foi abegosu. Na mañana d'ayeri, el Director Rexonal De Deportes, Daniel Gutiérrez Granda, y el Presidente en funciones del Club, Félix Baragaño, llograben pesllar un alcuerdu de colaboración pa los prósimos cuatro años por un importe total de 850.000 euros, que nos próximos díes va concretase cola firma d'una declaración d'intenciones na Presidencia del Gobiernu cola presencia nel mesmu del Presidente del Principáu, Vicente Álvarez Areces, pa dempués firmase l´alcuerdu definitivu aprebáu pol Conseyu de Gobiernu.


Pela tarde na Casa'l Deporte de Xixón l'equipu dio una rueda de prensa na qu'esplicó'l procesu desendolcáu nos caberos díes. Félix Baragaño entamó diciendo que se ficiera un gran esfuerzu per parte de toos y que l´alcuerdu verbal llográu pela mañana permitía apuntar l´equipu dempués de pasar los dos últimos trámites: presentar los nuevos avales y pagar el depositu d´inscripción. Amás sopelexó que l´alcuerdu algamáu taba averáu a les peticiones del Conseyu d´Alministración y que yera l´entamu d´un esfuerzu que van tener que facer a partir d´agora. Señaló que se taba más cerca de llograr l´equilibriu presupuestariu y de la pervivencia del Club a mediu plazu. Baragaño tamién fizo un llamáu a la colaboración de tola afición, patrocinadores, Ayuntamientu y Principáu, pa tirar p´alantre.


Pela so parte Daniel Gutiérrez Granda ratificó les pallabres de Baragaño y dixo que güei yera un día importante pal deporte asturianu, pues el Farho Xixón Baloncestu ye un club emblemáticu n´Asturies y referente na rexón y n´España, pues va a cumplir venticinco años y ye`l tercer o cuartu club d´Asturies. Señaló les dificultaes pasaes nos últimos años pel club xixonés y tuvo pallabres d´eloxu pa Félix Baragaño por dar tresperencia na xestión deportiva y económica. Dixo que l´alcuerdu diba durar cuatro años, hasta`l 2008 y que yera por 850.000 euros (141 millones de pesetes), entamando esti añu con 100.000 euros, 200.000 en 2006, 300.000 en 2007 y 250.000 en 2008, y va a pagase añu a añu, ensin la posibilidá d´englobase nun únicu pagu.


Amás señaló Gutiérrez Granda que l´alcuerdu pasa por una xestión serio y tresparante y tamién pol sofitu del patrocinador, Calefacciones Farho, que ye fundamental na so viabilidá, ello aparte de de ser ún de los meyores del baloncestu español.
Tamién fizo un llamamientu a otres persones que tienen qu'apostar pol Club, como los socios y l'afición, pues van a ser fundamentales nel so futuru col so sofitu, amás del esfuerzu de Baragaño, el Principáu y Farho. Llamó-y l´atención que na última Xunta Xeneral d´Accionistes hubiera mui poca xente y que esto foi mui negativo pa la sociedá. Valoró`l proyeutu como xoven y atractivu y qu´agora entama a funcionar positivamente no económico y no deportivo.


Félix Baragaño tamién comentó qu´esti añu`l presupuestu diba ser dalgo más pequeñu que`l pasáu por delles causes, como que parte de los técnicos dependen de la Fundación del Xixón Baloncestu y que van reducise les deudes atrasaes con ex-xugadores, como yeren los caos de Espinosa y Pacreu. Anque va a mantenese la calidá deportiva la plantilla.
Pa Gutiérrez Granda`l Farho Xixón Baloncestu va a ser agora ún de los clubes más solventes la categoría si se xestiona con seriedá, sentíu común y trespariencia.
Pa finar falóse qu´hai dos xugadores con contratu, Chus Poves y Amtxon Iturbe, y qu'hai un alcuerdu con Rubén Suárez. Nel capítulu d´incorporaciones ta pa zarrase la cesión de Juan Ignacio Jasen del C. B. Granada, hermanu del ex-xugador local, l´arxentinu Pancho Jasen.