El Farho Xixón Baloncestu perdió nun partíu nel que nun tuvo oportunidaes

El Farho Xixón Baloncestu salió derrotáu del pabellón de Los Barrios por un 81 a 66, nun partíu nel que siempres foi tres del equipu andaluz y que nun tuvo oportunidaes pa ganalu. El C.B. Los Barrios tuvo una másima ventaya de de 18 puntos, con un 38-20 y un 40-22. Amás nel tiru esterior los porcentajes de los xixoneses foron permalos, con 4 canastes de 14 intentos, un 29%, nel tiru de trés. Per otru llau l´equipu asturianu quexóse del estáu del parqué, pues taba llentu y esto fizo que los xugadores xixoneses cayeran seyes vegaes cola posesión del balón.

El partíu entamó con una ventaya curtia pal Farho, un 2-6, pero los locales punxiéronse perdelantre nel marcador y dende ehí hebo ventayes mínimes ente los dos equipos, hasta llegase a un 13-14, nel que`l C. B. Los Barrios fizo un parcial de 8-0, poniendo nel lletrónicu un 21-14, y finando`l cuartu con un 25-17.

L´equipu andaluz emprimó mui fuerte'l segundu cuartu y fízo-y un parcial 16-3 a los xixoneses, poniéndose`l lletrónicu nun 36-20. Dempués d´un tiempu muertu los asturianos reaccionaron y llograron un parcial de 4-15, y llegóse al descansu con un 46-39. Hai de destacar nesti primer tiempu dos fechos, per un llau la lesión de Chus Poves cuando faltaben siete minutos pal descansu y per otru que Brando Wolfram nun llograra nengún puntu nesta primera parte. Nesta fastera`l meyor foi Josh Fisher con 10 puntos.

Nel tercer cuartu apaeció Wolfram qu´entamó con seis puntos y los xixoneses averáronse nel marcador y punxiéronse a siete puntos, 48-41. Entós el C. B. Los Barrios punxóse en zona y ésta atragantóse-y al Farho Xixón, con munchos fallos nel tiru esterior. El cuartu finó con un parcial de 15-10 pa los locales, un 52-41.

Nel caberu cuartu entamó con un intercambiu de canastes y Bigelow averó a los xixoneses a un 68-59, pero bien ceo l´equipu local punxo un 74-61. Dempués Antxon Iturbe encestó un triple y punxo un 74-64 nel lletrónicu, pero Darius Lane tamién metió otru triple y punxo un 79-64.

Nel Farho Xixón Baloncestu los meyores foron Josh Fisher (16 puntos, 2 rebotes, 5 asistencies y ficiéron-y 6 faltes personales), Roberto Morentin (12 puntos, 5 rebotes, 1 asistencia y ficiéron-y 3 faltes personales), Brandon Wolfram (16 puntos, 2 rebotes y 1 mate) y Antxon Iturbe (8 puntos, 1 asistencia, 2 balones recuperaos y ficiéron-y 4 faltes personales).

Los xugadores más destacaos del C. B. Los Barrios foron Ricardo Guillén (22 puntos, 4 rebotes, 1 tapón y ficiéron-y 6 faltes personales), Willie Walls (10 puntos, 1 asistencia. 1 balón recuperáu y 3 mates), 11 puntos, Julio González (11 puntos y 7 rebotes), Willie Walls (10 puntos, 11 rebotes, 1 asistencia, 1 balón recuperáu y 3 mates), Javier Pérez (10 puntos y 6 rebotes).

Alliniaciones:

Club Baloncesto Los Barrios: Rafa Monclova (5), Darius Lane (11), Julio González (11),Willie Walls (10) y Ricardo Guillén (22). Tamién xugaron: Javier Pérez (10), Anderson Schutte (12), Iker Urreizti, David García y Jesús Chagoyen.

Farho Xixón Baloncestu: Josh Fisher (16), Chus Poves (3), Mark Bigelow (11), Roberto Morentin (12) y Brandon Wolfram (16). Tamién xugaron: Francis Koffi, Iñaki Narros, Rubén Suárez, Juan Ignacio Jasen y Antxon Iturbe (8).

Árbitrios; Pere Munar y Rodrígo Labrac: El Farho Xixón nun tuvo eliminaos por personales, nel C. B. Los Barrios foi elimináu por cinco personales Rafa Monclova.

Partíu de la sétima xornada de lliga na LEB, que se xugó nel Pabellón Soldado Samuel Aguilar de Los Barrios.
Parciales per cuartos: 25-16, 21-23, 15-10 y 20-17.

Esti miércoles, dos de payares, hai otra xornada de lliga y los xixoneses van enfrentase nel Palacio los Deportes de La Guía a les nueve la nueche al Bruesa GBC, un recien ascendíu al mercar la plaza, qu´esta selmana cortó a Rob Lewin y fichó nel so llugar a Eric Cuthrell.