El Farho Xixón Baloncestu perdió nos últimos segundos

El Farho Xixón Baloncestu perdió pol resultáu de 80-78, nun partíu nel que mereció meyor suerte. Los xixoneses dominaron los dos primeros cuartos con una gran defensa, algamando diferencies de selce puntos,14-30, a lo cabero`l primer cuartu, y de diez nel descansu, 34-44. Amás l´equipu xixonés foi superior en dellos aspeutos, asina garró 32 rebotes por 27 de los canarios, los sos xugadores dieron 15 asistencies por 12 de los locales y tuvieron meyores porcentajes nel tiru de dos y llibre; pero perdió nel tiru de tres, amás perdió 19 balones por 9 de los xugadores canarios y fizo más personales, 26 por 19 de los tinerfeños.

El partíu entamó con una primera ventaya nel marcador pa los xixoneses de doce puntos, 8-20, algamándose'l final del cuartu con un 14-30, que facía albidrar esperances de victoria ente los asturianos. Nel segundu cuartu, anque'l Tenerife llegó a ponese a dos puntos, con un 34-36, los xixoneses caltuvieron la ventaya con dos triples de Rubén Suárez y llegóse al descansu col resultáu de 34-46.


Nel tercer cuartu les coses diben cambiar y los canarios con Pedro Rivero na pista, qu´encestó dos triples seguíos, punxéronse a 7 puntos, con un 50-57. Los xixoneses volvieron a tener diez puntos de ventaya con un 52-62, anque'l cuartu diba finar con un 58-62.


El Tenerife púnxose per primera vegada delantre nel marcador nel caberu cuartu con un 67-66 nel minutu 35, anque los xixoneses entá s´adelantaron con un 73-74 nel minutu 38. Nel últimu minutu entróse con un empate a 74, pero un triple de Espil punxo`l 77-74, dempués Iturbe encestó, poniendo un 77-76, llueu dos tiros llibres de Lenzly asitiaben un 79-76 y Poves encestó dos tiros llibres, 79-78, pero Rivero namás encestó ún tiru llibre na siguiente acción, perdiendo na última xugada chus Poves un balón que pudo ser la victoria o'l xugar la prórroga.


Nel Tenerife hai de destacar el llabor de Juan Alberto Espil (22 puntos, 6 triples y 6 faltes recibíes) y Pedro Rivero (18 puntos, 7 asistencies y 3 triples). Nel Farho Xixón Baloncestu`l meyor volvió a ser Brandon Wofram (17 puntos, 9 rebotes y 1 tapón), tamién hai de destacar a Roberto Morentin (10 puntos, 3 rebotes y 3 asistencies) y Juan Ignacio Jasen (13 puntos, 2 asistencies, 1 tapón y 3 faltes recibíes).

Alliniaciones:

Tenerife Baloncesto: Michael Lenzly (2), Juan Alberto Espil (22), Leslei Galen Young (4), Elton Tyler (12) y Bobby Martin (17). Tamién xugaron: Asier García (7), Pedro Rivero (18) y José Iván Rodríguez (2).

Farho Xixón Baloncestu: Josh Fisher (11), Chus Poves (15), Mark Bigelow, Roberto Morentin (10) y Brando Wofram (17). Tamién xugaron: Antxon Iturbe (6), Rubén Suárez (6), Juan Ignacio Jasen (13), Iñaki Narros y Francis Koffi.

Árbitrios: Ángel González Zumajo y Luis Bey Silva. Eliminaos por cinco faltes personales: nel Tenerife Elton Jamaul Tyler y nel Farho Xixón Josh Fisher. Unes dos mil persones nel Pabellón Insular de Tenerife Santiago Martín en San Cristóbal de La Laguna.
Parciales per cuartos: 14-30, 20-14, 24-18 y 22-16.