El Farho Xixón Baloncestu funde nel primer cuartu

El Baloncesto Fuenlabrada ganó al Farho Xixón Baloncestu pol resultáu de 91 a 72, nun partíu nel que pasó penriba del equipu xixonés, sobre too nun primer cuartu nel que sentenció con un marcador d'escandalu (31-11) y con una defensa que torgó muncho'l trabayu de los xixoneses. Nel segundu cuartu l'equipu asturianu esconsoñóun poco y ganó por seis puntos, llegando al descansu col resultáu de 47 a 34.

Nel segundu tiempu l'equipu madrilanu salió nuevamente con muncha intensidá y Wideman y Guardia arrequexaron a los pivots foriatos, llogrando diferiencies de más de venti puntos. L'equipu xixonés punxo más enfotu nel partíu y llogró ponese a12 puntos, pero'l Fuenlabrada otra vegada volvió a la so intensidá anterior y punxo una diferencia de 19 puntos nel lletrónicu.

Destacar nel Fuenlabrada, penriba de toos, a Tom Wideman, xugador l'añu pasáu del Xixón, con un estraordinariu partíu (25 puntos, 11 rebotes, 10 d'ellos defensivos, y ficiéron-y 6 faltes perosnales). Tamién hai de destacar a Salva Guardia (22 puntos y 6 rebotes), Francesc Solana (13 puntos, 3 rebotes y 8 asistencies) y Sergio Pérez (11 puntos y 6 rebotes).

Nel Farho Xixón el xugador más destacáu foi Chus Poves (20 puntos y 6 faltes personales recibíes). Tamién destacó Saúl Blanco con 12 puntos y 5 rebotes. Nesti partíu los pivots del equipu xixonés nun tuvieron afortunaos y asina Tim Young namás que fizo 7 puntos y garró 3 rebotes, dimientres que Keith Waleskovski tuvo un poco más entonáu con 10 puntos y 7 rebotes. Nuevamente foi baxa por mancadura'l capitán del equipu Antxon Iturbe.

Alliniaciones:

Baloncesto Fuenlabrada: Ferrán López (13), Rubén Quintana (7), Francesc Solana (13), Salva Guardia (22), Tom Wideman (25). Tamién xugaron: Jan Martín, Paco Martín, Jorge García, Sergio Pérez (11), David Gil.

Farho Xixón Baloncestu: Xavi Vallmajó (7), Chus Poves (20), Josep Pacreu (1), Keith Waleskowski (10), Tim Young (8). Tamién xugaron: Josep Ortega (4), Javier Candás, Jorge Lledó (7), Saúl Blanco (12), Rubén Suárez (3).

Los árbitrios del partíu foron los señores Miguel Ángel Garmendia y Fermín González. Foi elimináu por cinco faltes personales Tim Young. Unes dos mil persones nel Pabellón Fernando Martín de Fuenlabrada.

Parciales per cuartos: 31-11, 16-23, 26-17 y 18-21.