El Farho Xixón Baloncestu entamó la lliga ganando

Dempués d´un branu nel que'l club tuvo munchos pilancos pa la so superviviencia, el Farho Xixón Baloncestu entamó la Lliga LEB 1 con una victoria sobre el C. B. Tarragona con un resultáu de 73-62.

L´aspeutu más destacáu de los locales foi`l so poder rebotiador (48 en total, por 39 del contrariu), anque namás metió un triple de 13 intentos. Nel C. B. Tarragona hai de destacar la so falta d´aciertu nel tiru (sobre too nel de trés con 5 aciertos de 26 intentos).


Con una plantiya na que namás quedaben trés xugadores de la temporada pasada (Rubén Suárez, Antxon Iturbe y Chus Poves) el Farho Xixón emprimó la Lliga con un conxuntu que na pretemporada dexo un bon tastu nos sos aficionaos y na que nuevamente se volve a correr un gran riesgu al cuntar per un llau con xugadores xóvenes, que viene a Xixón a xugar los minutos que n´otros clubes nun tienen, y per otru llau con un americanu, Brandon Wolfram, que llevaba trés años ensin xugar, con toles dubies que esto pue xenerar.


El partíu entamó con un Farho Xixón que nun alcontraba`l so llugar nel parqué y con un C. B. Tarragona qu´algamaba diferencies d´hasta 13 puntos, con un 8-21 a 3´5´´ pa finar el primer cuartu. Namás se salvaba nesti desconciertu Wolfram, con 6 puntos, dos tapones y el so llabor baxos los tableros nel rebote. Dempués d´esa másima diferencia l´equipu local apretó en defensa y el C. B. Tarragona tuvo dos minutos ensin llograr encestar. Nos catalanes destacó nesti cuartu Berni Álvarez, que llogró tres triples.


Foi nel segundu cuartu cuando les coses camudaron y d´entrada los xixoneses llograron un parcial de 6-0, averándose a cuatro puntos, y nuevamente`l trabayu en defensa de los locales fizo que`l C. B. Tarragona tuviere dos minutos ensin encestar, con un resultáu de 19-23. Dempués el partíu mantúvose con esi marxe, qu´unes vegades yera de trés puntos y otres de cinco a favor de los catalanes, hasta que cuando quedaben 3´21´´ Wolfram ganó un balón nel suelu y encestó, poniendo un empate a trenta y ún nel lletrónicu. Hasta lo cabero`l cuartu produxéronse una riestra de canastes nun sitiu y nel otru, con diferencies mínimes pa los catalanes, la másima foi de cuatro puntos, un 33-37. Cuando faltaba 1´3´´ Fisher empataba a 37 y una personal de Poves a Alejandro Alba, que namás metía un tiru, dexaba`l resultáu nun 37-38.


Nel tercer cuartu foi cuando l´equipu local garró`l mandu y yá nun lu diba a soltar, asina una canasta de Wolfram ponía a los xixoneses per primera vegada delantre nel marcador con un 39-38. Dempués la falta d´aciertu nel tiru del equipu foriatu, asina Berni Álvarez falló dos triples seguíos, y la defensa local ficieron que`l Farho Xixón emtamara a garrar diferencies nel marcador, primero de cuatro puntos, dempués de siete y de nueve faltando 4´10´´, piesllando`l cuartu dempués d´una canasta de Wolfram. Hasta finar el cuartu les diferencies foron de siete puntos, nueve y a lo último de cinco, con un triple de Mesa pa los tarraconeses.


Nel cuartu que finaba`l partíu`l Farho Xixón supo alministrar la so ventaya, manteniendo diferencies d´ente cinco y ocho puntos, que namás nos caberos momentos foron mayores, con una última canasta de Wolfram que ponía`l definitivu 73-62. Nesti cuartu viéronse coses guapes, como un triple de Wolfram dempués d´una asistencia de Poves, un robu balón de Josh Fisher con canasta. Tamién hai de destacar, amás del trabayu de Wolfram, a Antxon Iturbe que llogró ocho puntos. Nel Tarragona volvió a apaecer Berni Álvarez y lesionóse Pau del Tio. Pente dalgunos minutos el partíu foi un correcais con manches personales y nel que nengún de los dos equipos llograba encestar.


Nel Farho Xixón Baloncestu hai de destacar el gran trabayu de Brandon Wolfram (27 puntos, 8 rebotes, 4 tapones, 3 faltes recibíes y 33 puntos de valoración); Josh Fisher, qu´anque entamó mal dempués foi entonándose (14puntos, 5 rebotes, 5 asistencies y dos mates) y Antxon Iturbe (9 puntos, 7 rebotes y 2 asistencies).


Per parte`l C. B. Tarragona los meyores foron Berni Álvarez (18 puntos y 2 rebotes), Anthony Evans (10 puntos, 6 rebotes y 2 tapones) y Victor Cuthbert (12 puntos, 9 rebotes y 3 balones recuperaos).


Alliniaciones:


Farho Xixón Baloncestu: Josh Fisher (14), Chus Poves (7), Mark Bigalow (12), Roberto Morentin (2) y Brandon Wolfram (27). Tamién xugaron: Rubén Suárez (2), Antxon Iturbe (9), Iñaki Narros, Juan Ignacio Jasen y Francis Koffi.


C. B. Tarragona: Pau del Tío (2), Berni Álvarez (18), Cuthbert (10), David Mesa (4) y Anthony Evans (6). Tamién xugaron: Alejandro Alba (7), José Manuel Megía, Facundo Venturini (3) y José María Guzmán (6).


Árbitrios: los señores Francisco Javier Afonso Castillo y David Manuel Guillén Riveiro. Eliminaos por cinco personales, nel Farho Xixón Baloncestu, Antxon Iturbe (minutu 39) y, nel C. B. Tarragona, Cuthbert (minutu 35). Unes dos mil persones nel Palaciu los Deportes de la Guía en Xixón.
Parciales per cuartos: 13-23, 24-15, 17-11 y 19-13.