El Farho Xixón Baloncestu enguedeya la so clasificación cola derrota de Plasencia

Nun partíu mui igualáu l'equipu xixonés salió derrotáu por ún puntu (64-63) y perdió la octava posición que-y daba derechu a xugar los "play-off"pol ascensu y qu'agora tien el Plasencia Galco. Lo único positivo d´esti resultáu foi que'l Farho Xixón gana'l "basket-average" en cuntes qu'en Xixón ganó de trés puntos.

El partíu decidióse nos caberos segundos con una decisión de los árbitrios mui criticada pol entrenador de los xixoneses, pues pitáron-y una técnica. L´equipu xixonés entró nel caberu minutu ganando de cinco (58-63), pero un triple de Victor Cothbert, qu'averó al los estremeños a dos puntos (61-63), y la técnica a Diego Tobalina cuando faltaben 58 segundos pa finar el partíu, traxeron la polémica. Carles Canals falló los dos tiros llibres pero l´equipu estremeñu tuvo nuevamente la posesión y Victor Cuthbert empató l'alcuentru a 63. Na siguiente xugada a Jorge Lledó tocáron-y una personal n'ataque sobre Balmón, que namás tuvo que meter un tiru llibre pa poner al so equipu per delantre con un 64-63, que va a ser definitivu. Con diecisiete segundos de posesión per delantre, Vallmajó llanzó un triple y Balmón punxó un tapón illegal, cuando'l balón taba baxando, pero los árbitrios nun dieron la canasta nuna nueva xugada polémica.

El partíu entamó con un primer cuartu mui igualáu y nel que los xixoneses ganaron por trés puntos. El segundu cuartu entamó con una diferencia pal Farho Xixón de cinco puntos (16-21), pero un parcial pa los estremeños de 7-0 púnxolos per delantre (23-21).Los locales llegaron a tener una diferencia másima de ocho puntos (35-27) con un parcial pa ellos de 10-0. El Farho Xixón reaccionó, rellumando Saúl Blanco que llogró 6 puntos, y que punxo'l macador nun 36-35 pal descansu.

Nel tercer cuartu cinco puntos siguíos de Lledó llevaron a los xixoneses a un 38-40 y Young y Iturbu punxieron un 40-45. Dempués vieno una másima diferencia de 40-48 con un triple de Lledó, pero los estremeños recuperáronse y punxéronse a un puntu con un 47-48, resultáu col que finó'l cuartu.

El caberu cuartu entamó con un triple de Vallmajó, que punxo'l resultáu nun 47-51. Nesti cuartu el Farho Xixón siempre foi ganando hasta esi últimu minutu, con diferencies de cinco puntos en delles fases (51-56). Namás que se produxo un empate a 56, pero nuevamente volvió a ponese delantre l'equipu asturianu con un 56-60, llogrando los puntos Vallmajó y Pacreu. Dempués entróse nel caberu minutu que yá se conoz.

Nel Farho Xixón destacó Tim Young (14 puntos y 8 rebotes), Lledó (12 puntos y 6 rebotes), Saúl Blanco (11 puntos, 4 rebotes y 2 balones robaos) y Keith Waleskowski (11 puntos y 4 rebotes). Nel Plasencia Galco rellumó Carles Canals (12 puntos, 3 rebotes, 5 asistencies y 3 balones robaos), que foi'l meyor xugador del partíu; tamién hai de destacar a Jonathan Barceló (15 puntos, 5 rebotes, 3 asistencies y 6 faltes personales recibíes).

Alliniaciones:

Plasencia Galco: Carles Canals (12), Howard Brown (12), Jonathan Barceló (15), Mario García (6) y Victor Cuthbert (9). Tamién xugaron: Javi Pérez, Javi Simón (3), José María Balmón (7) y Adrián García.

Farho Xixón Baloncestu: Xavi Vallmajó (9), Saúl Blanco (11), Josep Pacreu (2), Keith Waleskowski (11) y Tim Young (14). Tamién xugaron: Jorge Lledó (12), Rubén Suárez y Antxon Iturbe (4).

Árbitrios: los señores José Antonio Pagán y Rafael Bey. Tuvieron presentes 2500 persones nel partíu xugáu nel Pabellón Ciudad de Plasencia. Eliminaos por cinco personales: Mario García nel Plasencia Galco y Jorge Lledó nel Farho Xixón Baloncestu.
Parciales per cuartos: 16-19, 20-16, 11-13 y 17-15.