El Farho Xixón Baloncestu allóñase del ascensu

Cola derrota d'ayeri escontra'l Melilla Baloncestu y les victories del C. B. Los Barrios en Zaragoza y del Cáceres 2016 n'Ourense, el Farho Xixón Baloncestu ta un poco más lloñe de les places pol ascensu, pa les que mira agora dende la 11ª posición tres d'una xornada na que lo único positivo pal Xixón foi la derrota del Plasencia Galco en Fuenlabrada.


Nel partiu de güei'l Farho Xixón sofrió la cuarta derrota seguía. El partíu decidióse nos últimos segundos pol resultáu de 77-79, dempués de xugase una prórroga, pero l'equipu xixonés yá fundiere nel tercer cuartu, ello con llegar al descansu con una ventaya de diez puntos 39-29 y tener una diferencia d'hasta 13 puntos penriba, con 36-23, nel segundu cuartu. Foron determinantes na derrota la falta d'aciertu dende'l perimetru, con 4 triples de 19 intentos (21%) y 24 tiros de dos de 52 intentos (46%) per otru llau les rotaciones nun foron acertaes, y asina Waleskowski xugó 44´57´´ de los 45 minutos del partíu ensin que se-y diere descansu y Josep Ortega nun tuvo nin un minutu, siendo yá'l segundu partíu que pasa inéditu.

L´alcuentru entamó mui igualáu nos cinco primeros minutos del primer cuartu, pero dos canastes de Tim Young y un triple de Vallmajó diéron-y les primeres ventayes al Farho Xixón, finando'l cuartu con diez puntos de diferiencia gracies a un gran enceste de Saúl Blanco sobre la sirena. El Melilla nun fizo un puntu nos últimos trés minutos.

Nel segundu cuartu foi cuando l'equipu xixonés algamó una másima diferencia de 13 puntos, 36-23, dempués d´un robu de balón de Rubén Suárez al base del Melilla, Dani Rodríguez, llegando al final del periodu con una diferencia de diez arriba pa los locales, 39-29. Hai de destacar el llabor de Keith Waleskowski que llegó al descansu con 8 puntos y 13 rebotes, destacando'l trabayu fechu sobre Rod Sellers. La superioridá del Farho Xixón nesti primer tiempu, amás de nel marcador, vióse nel trabayu baxo tableros, al garrar 27 rebotes por 12 del Melilla.

Nel tercer cuartu`l Melilla Baloncesto esconsoñó, remontando los diez puntos que tuviera perbaxo y poniéndose dos penriba, 50-52, cuando faltaben dos minutos pa finar el cuartu. Foi fundamental pal Melilla'l trabayu de Rod Sellers con 7 puntos. El cuartu entamó con un parcial de 0-7 pal equipu foriatu cuando faltaben 7´8´´ y con un resultáu de 41-38, entós pidió tiempu muertu l´entrenador local. Asina'l Farho Xixón llogró un parcial de 6-0, poniéndose nun 46-40. Pero dempués d'una canasta de Sellers, con personal de Waleskowski y tiru amestáu, les diferencies foron mínimes, con empates a 50 y 52. El cuartu finó con una canasta de Waleskowski sobre la sirena
que ponía a los locales penriba, 54-52.

El caberu cuartu emprimó con trés ataque siguíos que fallara'l Melilla y con un parcial de 6 a favor del Farho Xixón, 58-52. Pero l´abusu del tiru esterior, que l´equipu local nun llograba encestar, y el bon trabayu de los americanos del Melilla, Sellers y Bergensen, punxieron la igualdá nel marcador. Asina llegóse a la caberos minutos. Poniéndose perdelantre`l Melilla a cuatro minutos pa finar con un 61-62. Walleskowski encesta unos tiros llibres d'una personal y recupera un balón anticipándose a Sellers y Young mete dos tiros llibres d´otra personal, poniéndose'l Farho Xixón nun 65-62. El Melilla iguala nuevamente`l partíu y lleguen los dos últimos minutos onde los árbitrios nun quisieron saber ná de lo que pasaba baxo les canastes. Con un empate a 66 a 59´´, Saúl Blanco llogra una canasta dempués de robar un balón, pero un triple de Bergensen a 35´´ 6 décimes pon un resultáu nun 68-69. Nel siguiente ataque Waleskowski falla'l tiru y Vallmajó fae falta personal a Vickery que namás mete un tiru llibre, 68-70, con 10´´6 décimes. Ye entós cuando Saúl Blanco llogra un mate espectacular cola mandrecha y empata'l partíu a 70, teniendo que xugase una prórroga de 5 minutos.


La prórroga entamó bien pa los locales, que punxeron el marcador en 74-70 con canastes de Saúl Blanco y Vallmajó, llegándose al 76-72 con otru enceste de Waleskowski, pero un triple de Bergensen, que foi'l xugador que desequilibró'l partíu na prórroga, y una mala escoyeta nel tiru del Farho Xixón punxeron un preocupante 76-75. Pacreu tien dos tiros d'una personal p'abrir diferiencies, pero namás ye a meter ún tiru llibre, dexando un 77-75 que Bergensen convierte n'empate a 77 con dos tiros llibres. Faltaben 49 segundos y Pacreu pierde un balón nuna xugada tonta, dexándo-y el trabayu fechu a Bergensen pa poner el 77-79 definitivu. El marcador yá nun se movió, pero sí qu'hubo de too na pista, con una personal n´ataque de Young cuando falten 9´´9 décimes y cola quinta de Waleskowski a 3´´ 9 décimes, fallando Bergensen los dos tiros llibres. Al Farho Xixón quedó-y tiempu pa un ataque final, pero Saúl Blanco nun foi quien a encestar.


Nel Farho Xixón destacar el trabayu de Waleskowski, el meyor xugador del partíu (20 puntos, 18 rebotes, 3 asistencies y una valoración de 34), Tim Young (14 puntos, 11 rebotes y 7 personales recibíes) y Xavi Vallmajó (12 puntos) y un irregular Saúl Blanco (13 puntos, 3 rebotes y 4 personales recibíes). Nel Melilla Baloncesto hai de destacar a Rod Sellers (20 puntos, 15 rebotes y 5 personales recibíes); Roberto Bergensen, qu´en delles estayes del partíu echóse l´equipu al llombu, (21 puntos y 4 rebotes), José Miguel García (12 puntos, 6 rebotes y 5 asistencies) y Nacho Romero (11 puntos y 4 rebotes).

Alliniaciones:

Farho Xixón Baloncestu: Xavi Valmajó (12), Saúl Blanco (13), Jorge Lledó (7), Keith Waleskowski (20) y Tim Young (14). Tamién xugaron: Josep Pacreu (8), Rubén Suárez (2), Chus Poves y Antxon Iturbe (1).

Melilla Baloncesto: Joe Vickery (4), José Miguel García (12), Salvador Arco (4), Nacho Romero (11) y Rod Sellers (20). Tamién xugaron: Roberto Bergensen (21), Kamal Al-Hammouti, Francis Koffi, Angelo Flanders (4) y Dani Rodríguez (3).
Árbitrios: los señores Pere Munar y Alberto Fraile. Eliminaos por cinco faltes personales, nel Farho Xixón Baloncestu, Keith Waleskowski y Tim Young y, nel Melilla Baloncesto, Nacho Romero.

Unes dos mil persones nel Palaciu los Deportes de la Guía.
Parciales per cuartos: 20-10, 19-19, 15-23, 16-18 y 7-9.