El fútbol asturianu decide parar por unanimidá

Nun va haber fútbol n’Asturies esta fin de selmana, salvo en Segunda (El Molinón), Segunda B (Miramar, Les Caleyes y Ganzábal) y División d’Honor Xuvenil (Braña-Sur). El fútbol asturianu decidió n’asamblea facer fuelga esta mesma xornada en protesta pola reducción de subvenciones y la normativa fiscal del Conseyu Superior de Deportes (CSD) qu’obliga a los clubes dar d’alta a toles persones que tengan una remuneración fixa, ente otros asuntos.

Cola participación de 160 de los 304 persones con derechu a votu, l’asamblea estraordinaria de la Real Federación de Fútbol del Principáu d’Asturies celebrada ayeri na Llaboral decidió por unanimidá parar toles competiciones de fútbol que se celebren n’Asturies, lo qu’inclúi la propia Tercera División, la Lliga Estatal Xuvenil o la Tercera de fútbol-sala –categoríes de calter estatal que tienen delegaes les federaciones territoriales–. Onde hebo división foi na escoyeta de la fecha pa celebrar la fuelga, cola opción de convocala yá o atrasala a la xornada siguiente pa nun perxudicar a los equipos de sala que tuvieren alquilaos los sos pabellones pa esta fin de selmana, optando los asambleístes finalmente pola primera, con 93 votos a favor.

D’esta forma, el fútbol asturianu quier dar un golpe enriba la mesa y abanderar una protesta que pretende estender a tol fútbol estatal –inclusive al ámbitu profesional al traviés de la Federación Española de Fútbol (RFEF)– y a tol deporte base. Les razones de dar esi pasu son varies y tien el so focu puestu tanto nel Gobienu estatal como nel nacional. Una de les principales ye la normativa fiscal del Conseyu Superior de Deportes (CSD) qu’obliga a los clubes dar d’alta a toles persones que tengan una remuneración fixa, un costu que sería inasumible pa estes entidaes, según esplicó na asamblea l’asesor xurídicu de la Federación, Héctor Quintanilla. Tamién esmolez enforma a los dirixentes que les xuntes direutives tengan qu’afrontar col patrimoniu propiu les multes y sanciones nel casu d’incumplimientu de la normativa, lo qu’agravaría entovía más la crisis de direutivos que vive’l fútbol asturianu.

Otra demanda de los clubes al Gobiernu estatal ye la recuperación del 1 por cientu del ingresu poles quinieles que recibía la RFEF y qu’ésta destinaba a les territoriales p’alcuerdos colos conceyos pa la construcción y mantenimientu d’instalaciones deportives. Mentes, les quexes referíes al Gobiernu asturianu vienen pola reducción continuada nes subvenciones y pola paralización que vive na Xunta Xeneral el desarollu reglamentariu Llei de Xuegu y Apuestes que permitiría a los clubes recuperar los bingos y lloteríes familiares.

Partíos d’esta fin de selmana

Dada la situación, los únicos partíos que van celebrase esta fin de selmana n’Asturies son los correspondientes a les categoríes que dependen direutamente de la RFEF nos qu’hai equipos asturianos, esto ye, Segunda División, Segunda B y División d’Honor xuvenil. Nesta xornada van xugar como llocales el Sporting (Albacete), el Marino (Atlético Astorga), el Lealtad (Real Murcia), el UP Langreo (Coruxo) y el Llano 2000 (Veriña).

Semeya propiedád de la Real Federación de Fútbol del Principáu d'Asturies.