El físicu Juan Ignacio Cirac Sasturain, premiu Príncipe d'Asturies d'Investigación

El Xuráu de los Premios Príncipe d'Asturies concedió-y esta maña'l distingu d'investigación científica y técnica, dotáu con 50.000 euros al físicu Juan Ignacio Cirac Sasturain (Manresa, 1965), que dirixe n'Alemaña'l Departamentu d'Óptica Cuántica del Institutu Max Planck. L'acta empondera los sos avances nel campu de la información cuántica como xustificación del premiu. Según l'acta, les sos investigaciones "amiesten d'una parte la física cuántica, qu'esplica'l comportamientu de la materia a nivel atómicu y subatómicu y d'otra parte la teoría de la información, que describe'l procesu, almacenamientu y tresmisión de datos, destacando los sos llogros na teoría cuántica de la lluz y la física atómica". El xuráu sorraya que les investigaciones de Cirac Sasturain son decisives nel desarrollu d'ordenadores capaces de francer los topes actuales de la supercomputación y nel desarrollu de comunicaciones más segures.

El físicu manresán ya fuere finalista d'esti premiu nel 2005, pero daquella'l xuráu decidióse pola candidatura del neurólogu portugués Antonio Damasio polos sos avances na investigación sobre'l Parkinson y l'Alzheimer. Nesta edición 2006 llegaren a la fase final de les votaciones los biólogos Ginés Morata y Peter Lawrence, y los químicos Avelino Corma y James Fraser Stoddart.