El documentu de l’ALLA sobre’l Plan de Normalización Llingüística plantega cinco exes sobre les que trabayar

RTPA, recuperación toponímica, sistema educativu, vida institucional y la llingua como espresión cultural y creativa son les cinco exes básiques sobre les que xira’l documentu de l’Academia de la Llingua Asturiana (ALLA) sobre’l futuru Plan de Normalización Llingüística, al que pudo tener accesu Asturies.com. Un esquema con propuestes acordies a la llexislación vixente que la institución treslladó y trató n'aconceyamientos con Gobiernu y grupos parllamentarios.

Entituláu ‘Exes básiques y dalgunes consideraciones pal Diseñu d’un Plan de Dignificación y Usu del Asturianu’ presenta un diseñu de trabayu xeneral en cinco puntos introducíos col oxetivu a algamar en caún y acompañaos d’aiciones a desendolcar, afondar y completar en tolos ámbitos. “Tales consideraciones ha entendese dende un inequívocu enfotu de collaboracion y sofitu a la política llingüística qu’Asturies demanda y necesita”, espresa la institución na entradina.

El primeru que trata’l documentu, priváu hasta la fecha, ye ‘Medios de comunicación de titularidá pública (RTPA)', que tendría la “finalidá básica” de “dignificar l’usu públicu y formal d’un estándar asturianu equilibráu y asequible pa la ciudadanía y tresmitir la idea d’una coexistencia harmónica y complementaria ente asturianu y castellanu”. Ente les aiciones plantegaes ta un porcentaxe del 50 por cientu en TPA “pa cada llingua en toles franxes horaries y toa cla de programes”, con informativos completos y espacios infantiles, musicales, deportivos y magazines, asina como un “usu porcentual mayoritariu del asturianu na programación de la RPA en toa clas de programes y franxes”.

“Popularizar y prestixar l’eonaviegu como la ‘otra’ llingua d’Asturies habría ser un oxetivu estratéxicu del Plan. Nesti sen, el so pesu porcentual como llingua d’usu nos medios públicos habría ser abondo mayor que’l que se correspuende col so pesu demográficu”, apunta sobre l’idioma del occidente. L’ALLA, d’igual forma, tamién encamienta fomentar l’usu del asturianu nos medios privaos.

Normativa clara nel usu de la toponimia oficial

‘Recuperación toponímica’ ye la segunda exa del esquema plantegáu, que se centraría “en xeneralizar l’usu oficial (nos ámbitos institucional y social) de los nomes de llugar asturianos non solo como manifestación del respetu a la cultura tradicional, sinón tamién como esixencia xurídico-normativa básica derivada del cumplimientu de la Llei d’Usu del Asturianu”. Entes les recomendaciones, el “afitamientu d’una normativa, clara y precisa, pal usu institucional y social de los topónimos oficiales del Principáu d’Asturies” o de calces de comunicación con entidaes privaes, como La Vuelta, “pa que na so actuación respeten la toponimia tradicional asturiana de calter oficial”.

No que respeuta al ‘Sistema educativu’ la finalidá básica “habría ser, acordies cola norma llegal, non solo ufiertar, sinón ‘promover’ la enseñanza voluntaria del asturianu y del eonaviegu (nel so ámbitu) en toles estayes educatives non universitaries y treslladar a les families les ventayes sociales, culturales y académiques del so estudiu escolar pa facer vidable, amás y darréu d’ello, la llibertá del usu llingüísticu”. La especialidá docente, recuperar esperiencies de llingua vehicular, la meyora de los planes universitarios sobre manera no que cinca a la formación del profesoráu o la presencia nes escueles oficiales d’idiomes son dalgunos de los aspeutos que toca nesti puntu la institución.

“Poner en práutica midíes específiques d’emplegu, visualización y prestixu del asturianu y del eonaviegu nel ámbitu institucional del Principáu y fomentar el llibre usu llingüísticu per parte de la ciudadanía asturiana” ye l’oxetivu que marca nel puntu 4, ‘Vida institucional’. L’activación del muérganu de traducción previstu na Llei d’Usu, la edición billingüe del BOPA, documentación billingüe y la promoción del idioma nel ámbitu municipal son elementos que se planteguen pal so desendolcu.

Por último, l’ALLA pon importancia en ‘La llingua como espresión cultural y creativa’ p’amosar “les posibilidaes de la llingua asturiana como espresión d’una cultura viva, actual, inclusiva y proyeutada hacia’l futuru”. Dalgunes aiciones a considerar seríen collaboración cola ESAD o col CISLAN pa la esistencia de planes formativos que tengan al asturianu como oxetivu, un Plan Llector empobináu a la infancia y la mocedá, busca d’una mayor proyeición de la cultura n’asturianu tanto dientro como fuera del país o promoción de la divulgación científica y cultural nel idioma.

“Son, namái, dalgunes suxerencies p’amestar, nel so casu y como llinies temátiques, a un plan de dignificación llingüística y cultural que, con esti algame y ambición, nun tendría precedente n’Asturies”, espresa al final del documentu la institución.

Ensin renunciar a la oficialidá

El plantegamientu de l’ALLA ye que la duración del Plan de Normalización “sedría pluriañal y faciendo por coincidir cola propia llexislatura autonómica (4 años), magar la so puesta en práutica podría facese en fases, acordies con necesidaes organizatives y de xestión”. Entiende que’l so siguimientu habría tener calter semestral, con una Comisión de Siguimientu “reducida y operativa (al rodiu de 5 persones especialistes y/o con responsabilidá na so xestión)” con instrumentos específicos d’evaluación como datos de cumplimientu de plazos y fases, analizadores sociales, impautu nos medios, indicadores sociolóxicos y estadísticos, etc.

“El Plan podría llevar darréu, y de mou paralelu, un desarrollu llexislativo-normativu. Nesti sen, ye conveniente valorar la posibilidá de modificación de l’actual Llei d’Usu o l’apueste por una normativización efeutiva y urxente de la mesma (decretos, órdenes, instrucciones…)”, considera, ensin escaecer “factores como la complexidá parllamentaria d’ellaboración d’una llei y el fechu, perimportante, de que l’actual norma llegal pasó’l trámite de la so constitucionalidá nel Tribunal Constitucional”.

D’igual forma, asegura que “la puesta en práutica del Plan nun habría implicar, sinón tolo contrario, nenguna renuncia o aplazamientu de la demanda de la oficialidá. Nesti sen, habría caltenese la busca permanente del consensu coles fuerces polítiques representaes na Xunta Xeneral qu’entá nun s’alliniaron cola previsión del artículu 3.2 de la CE”.