El discursu de Trump esmolez al 53 por cientu de los llectores d’Asturies.com

La victoria de Donald Trump nes eleiciones a la presidencia de los Estaos Xuníos, la entovía mayor potencia del Mundu, ximielgó’l planeta la selmana pasada. Un 53 por cientu de los usuarios d’Asturies.com amosó nel nuesu ‘Conceyu Abiertu’ el so esmolecimientu pol discursu del neoyorquín.

La entruga plantegada a los llectores foi ‘¿Esmolez-y la victoria de Donald Trump nes presidenciales estauxunidenses?’, a lo qu’un 53 por cientu escoyó la opción ‘Sí, porque’l so discursu mete mieu’, mentes qu’un 47 por cientu prefier quitar fierro al asunto y considera que les sos manifestaciones xenófobes o machistes ‘son babayaes de campaña que va dexar atrás cuando garre’l cargu’. Trump, del Republican Party, ganó contra too pronósticu’l martes pasáu les eleiciones presidenciales estauxunidenses al superar Hillary Clinton por 306 a 232 votos eleutorales nuna cita coles urnes nes que la demócrata sacó 280.646 apoyos más que’l so rival.

Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer la opinión de los nuesos llectores sobre’l cachopu, esi platu ‘modernu’ de la nuesa cocina tan de moda anguaño qu’inclusive ocupa fueyes de periódicos estranxeros de sonadía como ‘The Guardian’.