El director de l'Academia Española ignoró l'asturianu

El director de l'Academia Española de la Lengua, l'asturianu Víctor García de la Concha, ignoró dafechu cualquier referencia al asturianu nel discursu que dio na Universidá de Salamanca con motivu d'un homenaxe. De la Concha emponderó los valores del billingüismu y condenó les situaciones de diglosia pero llendando la referencia a la convivencia ente castellanu, catalán, vascu y gallegu.

Nel so discursu Víctor García de la Concha dixo qu'aquelles comunidaes autónomes que cuenten con llingua propia "han facer un apueste pol billingüismu real en cuantes qu'ello ye en definitiva una riqueza de toos" amestando que "nun tien por qu'haber la llucha nin la tensión que se da dacuando dende les instancies polítiques".

El filólogu de Maliayo, presidente de la Real Academia Española de la Lengua y caderalgu de la Universidá de Salamanca esplicó que "debe promovese'l billingüismu y non la diglosia, qu'apauta la superioridá d'una llingua sobre otra" emponderando'l marcu qu'apurre pa ello la Constitución Española "al reconocer que les cuatro llingües d'España son patrimoniu común de tolos españoles" escaeciendo cualquier referencia al asturianu na so rellación de llingües.