El difícil accesu a la vivienda

La vivienda ye un de los problemes más importantes na sociedá asturiana d'anguaño y sobremanera ye una de les torgues principales pa la independencia de la mocedá. N'Asturies, según un informe de Caixa Catalunya, el 52% de la renta familiar tien por destín mercar una vivienda. Les families asturianes tienen una renta media de 28.577 euros al añu pa facer frente a la compra de vivienda. Esti informe sorraya la xuba del 91,6% nel preciu de la vivienda nel periodu 1998-2003 mentanto que la renta familiar solo medró nesti espaciu de tiempu un 27,6%. Asina la perda de poder adquisitivu de les families ye bien clara y vien dada gracies a la especulación inmobiliaria por un llau y a la perimportante xuba de la demanda per otru, anque Caixa Catalunya esplica tamién apunta al aumentu del númberu de families (+1,7 millones) ente les causes.

Per comunidaes autónomes, Madrid rescampla como la rexón donde les families dediquen más renta a la inversión na casa: hasta'l 70%, y ye qu'Asturies con esi ablayante 52%, entovía ta perbaxo de la media española, que ye del 55,3%.

Sólo n'Asturies la demanda de viviendes nel 2003 xubió'l 16%, y según los datos que remana la patronal de la construcción asturiana la demanda va siguir tirando p'arriba hasta polo menos el 2006, con una demanda de 30.300 viviendes nueves nos próximos tres años. Un datu esaxeráu dada la importante sobreinversión inmobiliaria n'Asturies nos últimos años. La mocedá asturiano ye la más perxudicada por estes xubes que llanten una muria bien alta pa dexar la casa de los padres. La media pa mercar una vivienda ta en 11 años de sueldu, y la difícil situación llaboral d'Asturies nun ayuda a ello. La mocedá asturiano ye la que tien l'accesu a la vivienda más complicáu dientro del Estáu. Los altos precios de les viviendes, el paru xuvenil, la situación de subemplegu y l'índiz de temporalidá son los responsables. Como soluciones, los axentes sociales y l'Alministración planteguen construyir más viviendes protexíes, l'abaratamientu del suelu, camudar la llei de valoraciones de les viviendes de protección oficial, la creación d'axencies públiques de viviendes y potenciar los alquileres. Ver veráse si furrula.