El Descensu Internacional del Seya tien el so cartelu n’asturianu per primer vez nos sos 77 años de vida

|

Gracies a una iniciativa de Les Camisetes, firma ganadora del concursu de cartelos del LXXVII Descensu Internacional del Seya, la Fiesta de les Piragües va anunciase n’asturianu. Ye la primer vegada qu’esta prueba utiliza l’idioma del país.

La popular empresa familiar fundada por Manuel Cayarga en Cangues d’Onís nel 2003 y que cuenta con siete tiendes n’Asturies y Lleón, solicitó permisu a la organización de la prueba qu’atrae a miles de persones a Les Arriondes y Ribeseya’l primer sábadu d’agostu pa realizar una tirada de los cartelos de la edición d’esti añu n’asturianu, con una respuesta afirmativa siempre que la firma corriera colos gastos de la edición. Les Camisetes decidió dar el pasu alantre y dende güei tien a disposición de toles persones interesaes los cartelos na llingua del país –de tamañu 60x40 cm– nos sos comercios de Xixón, Uviéu, Ribeseya y Cangues d'Onis, con un máximu de dos per persona. Amás, entregó un tacu d’ellos a la organización, que se comprometió a difundilos.

Les Camisetes ye ún de los venti negocios que participa na campaña ‘La empresa asturiana muévese!’, impulsada por Iniciativa pol Asturianu, dende’l so entamu. Ésta busca introducir l’asturianu nel furrulamientu diariu de los negocios y dotar al idioma d’un status y un usu útil y activu na sociedá asturiana.

 

Contador Estadistiques