El Descensu del Seya, con pregón de Fernando Alonso

El pilotu asturianu de fórmula 1 Fernando Alonso va ser, sacantes problema d'axenda d'última hora, el pregoneru de la fiesta de les piragües, que va celebrase'l día 7 d'agostu con salida nel ponte de les Arriondes, como ye tradición.

L'anuncia fízose esta mañana na presentación oficial de la 68 edición del Descensu del Seya, una de les prebes deportives más propies del calandariu asturianu y qu'esti añu va contar cola participación de cerca de 1.200 deportistes. Según informó la organización del eventu, amás de munchos palistes asturianos y españoles, yá tan confirmaos hasta agora equipos internacionales de más de media docena de países. El prestixu de la preba llama a piragüistes de llugares tan alloñaos como Portugal o Sudáfrica y tamién de gran parte del equipu olímpicu de remu de l'Arxentina, que van venir a Asturies como preparación pa les olimpiaes d'Atenes qu'entamen el día 13.

Xunta lo deportivo, el calter de fiesta del descensu, preba declarada d'interés turísticu internacional, obliga, xunta la tradición, a traer un pregoneru de sonadía. Esti añu l'escoyíu ye Fernando Alonso, que se comprometió personalmente cola organización del descensu yá l'añu pasáu. Los organizadores del Seya conserven como preba una gorra firmada pol pilotu na que dexa escritu'l compromisu a nun faltar a la fiesta, pero l'axenda d'Alonso dexa un güecu a la posibilidá de que nun pudiere dir. Otramiente, el Seya va hermanase esti añu colos actos del Xacobeo 2.004, faciéndose'l día de la carrera un amestamientu simbólicu del gua del ríu Sil cola del ríu asturianu.