El derbi asturianu pon más de 3 puntos en xuegu

|
Sporting 1-1 Uviéu (9 de setiembre del 2017)

Sporting y Uviéu van enfrentase esti domingu nun partíu que pue considerase una final pa los dos equipos a pesar de que queden 12 xornaes de Lliga. Los roxiblancos necesiten la victoria pa nun perder de vista’l play-off, mentes que los azules saben que de ganar dexaríen fuera de la llucha pol sestu puestu al eternu rival.

El conxuntu dirixíu por Juan Antonio Anquela aventaya nestos momentos en cinco puntos al de José Alberto López, diferencia que podría ampliase a ocho, más el ‘goal average’, en caso de vencer n’El Molinón. Una distancia que sería práuticamente definitiva, dao’l golpe moral que tamién supondría, y que podría ser mayor entovía col sestu puestu que comparten agora Cádiz y Mallorca con 48 puntos, ún más que l’Uviéu y seis que’l Sporting.

Dambos equipos lleguen al derbi depués de ganar na anterior xornada, anque los xixoneses enganchen trés trunfos siguíos que faen recobrar una moderada esperanza a una afición que va enllenar El Molinón. L’Uviéu, pela so parte, va contar con 1.200 siguidores nel campu p’animar al so equipu a pesar de les indecentes midíes de seguridá que sufren les persones que se desplacen a disfrutar del derbi.

Omar Ramos, baxa

José Alberto cuenta cola dulda de Carmona, que güei namái fixo dalgo de carrera, y les baxes del lesionáu de llarga duración Isma Cerro y de los internacionales Lod y Dani Martín pal partíu que va comenzar a les 20.45 hores de mañana col arbitraxe del mozu Isidro Díaz de Mera Escuderos, del colexu castellano-manchegu. Tamién ye más que posible que nun se vista Blackman, que nun acaba de recuperar d’unes molesties de rodiya cróniques.

Per parte carbayona la única ausencia ye la d’Omar Ramos. L’estremu canariu sufre una rotura de fibras nel semitendinosu del muslu derechu pola que va tar fuera de la competición unes trés selmanes.

La gran folixa del fútbol asturiano va centrar tola atención del fútbol estatal por mor del parón de seleiciones FIFA. Asturies va quedar paralizada pa siguir un partíu nel que se xuegan muncho más que 3 puntos.

Na semeya, un momentu del derbi de la temporada pasada n'El Molinón, que finó con empate (1-1).

Contador Estadistiques