El Defensor del Universitariu amuesa bona disposición pa evitar casos nuevos de represión llingüística

|

Ramón Durán, Defensor del Universitariu de la Universidá d’Uviéu, aconceyó recién con Iniciativa pol Asturianu y el CUPA pol casu últimu de represión llingüística. Nel alcuentru amosó una bona disposición pa evitar estes situaciones.

En primer llugar, l'ex decanu de la Facultá de Derechu comprometióse a estudiar una recomendación a los órganos xestores universitarios basada na sentencia que'l Tribunal Superior de Xusticia d'Asturies emitió contra'l Reglamentu d'Usu del Asturianu de la institución por insuficiente con respeuto a la Llei d'Usu y Promoción del Bable/Asturianu del 1998. D’igual forma, va encamentar tamién a la formación del personal de la universidá asturiana nes competencies básiques d'asturianu pa que nun se repitan casos como l’asocedíu en payares, cuando una trabayadora de la secretaría de la Facultá de Formación del Profesoráu púnxose en contautu con un alumnu per teléfonu que presentara documentos na llingua del país. Ésta, de mui males maneres y ensin identificase en nengún momentu, espetó-y que los emplegaos de la institución “nun tienen por qué saber bable” y que “nun permitiríen nengún documentu más n’asturianu na facultá”. Por último, colgó-y tres comentar que nun entendía lo que l'estudiante taba argumentando.

Tanto Iniciativa pol Asturianu como’l Conceyu Universitariu pol Asturianu (CUPA) agradecen a Durán la so respuesta rápida tres el casu del alumnu represaliáu –el Defensor del Universitariu y el Decanu del Profesoráu unviaron-y una carta de disculpa– y la so bona disposición pa buscar soluciones llegales pal futuru.

Contador Estadistiques