El CUPA entama en Xixón la tercer edición del cursu básicu d'asturianu

|

El Conceyu Universitariu pol Asturianu (CUPA), en collaboración cola ALLA y Iniciativa pol Asturianu, abre la matrícula pa la tercer edición del cursu d’asturianu. Ésti ye de nivel básicu y tien como sede’l Conseyu de la Mocedá de Xixón.

Tres la bona respuesta de les dos ediciones anteriores, el CUPA decidió entamar otra vuelta’l cursu d’asturianu, anque nesta ocasión namái en nivel básicu, destináu pa persones ensin conocimientu de la llingua asturiana o con un nivel baxu. El cursu va principiar el 13 de payares y va tener una duración de 35 hores llectives repartíes ente los martes y los xueves de 19 a 21 hores, con un parón en Navidá. El preciu de martrícula ye de 50 euros y inclúi tolos materiales necesarios, ente ellos el manual ‘Xeitu’. Les persones que superen el cursu van recibir un diploma de l’Academia de la Llingua Asturiana (ALLA).

Los interesaos n’inscribise al cursu pueden facelo hasta’l 10 de payeres al traviés del corréu electrónicu conceyuasturianu@gmail.com o nel teléfonu 615.982.816. Dende’l CUPA señalen qu’ésti va valir a los alumnos pa tener “una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies”. 

 

AdxuntuTamañu
Image icon Cartelu cursu del CUPA en Xixón.jpg131.85 KB
Contador Estadistiques