El cume de Barcelona entama ensin alcuerdu

L'exe lliberalizador de Blair, Berlusconi y Aznar ta topando cola resistencia d'Alemaña y Francia, que tien elecciones dientro poco y nun quier sofitar la riestra de midíes empobinaes a la lliberalización del mercáu enerxéticu y l'abaratamientu del despidu qu'enllenen l'axenda. Esti ye'l primer resume de lo que se lleva del cume européu que se desarrolla ente güei y mañana en Barcelona. Nel bandu antiglobalizador, que ta celebrando'l so cume alternativu, lo más importante d'esti vienres ye la presentación güei de les conclusiones de les primeres xornaes del Forum Social de Barcelona, que presenta les sos alternatives nun actu públicu presentáu pol escritor Vázquez Montalbán. Pa siguir la evolución del cume européu recomendamos consultar el portal catalán Vilaweb.D'otra banda, tres la tranquilidá de la xornada d'ayeri, el vienres truxo los primeros enfrentamientos nes cais de Barcelona. La cosa entamó cuando un grupu de manifestantes intentó atacar los locales de les multinacionales Mc Donals y KFC de La Rambla, armándose darréu una escorribanda cola policía qu'acabó con nueve persones deteníes. Pa ver les cais de Barcelona ta bien echá-y una güeyada al web del Conceyu, que ufierta les imáxenes de les cámares de control del tráficu.