El Crossroad Festival rifa una guitarra mítica

Según va allegándose'l mes de xunetu, el Crossroad Festival de Xixón va ganando n'interés coles novedaes que presenta la organización. En primer llugar, dientro de la serie de conciertos promocionales del festival de rock, blues y música de raigón americana esta mesma nueche (miércoles día 30) toquen na sala Albéniz de Xixón los reis del garaxe-punk, el grupu Chesterfield Kings, nun conciertu qu'entama a les 21:30.

D'otra parte, mientres van corriendo los díes pa poder facese con abonos a preciu de descuentu pal festival, ta tamién abiertu hasta'l día 15 de xunetu'l plazu pa que los que yá tengan abonu puedan participar nun concursu bien especial. Ello ye que'l Crossroad rifa ente los tiulares d'abonu una guitarra orixinal valorada en 2.000 euros firmada por Buddy Guy, la gran estrella del cartel.

L'instrumentu en cuestión ye una Fender Stratocaster, un modelu míticu de guitarra electrica que cumple esti mes de xunu 50 años en mercáu dende que se presentare en 1954, cuando la "Strato" se convirtió na primer guitarra n'incorporar trés pastielles en cuenta de dos, que yera lo normal daquella, y tamién la primera en garrar la célebre forma de "doble cuernu" que dexa tocar el mastil más abaxo y algamar notes más agudes. D'entós p'acá, el modelu estrella de Fender convirtióse na guitarra de referencia de grandes intérpretes de rock y blues, casu d'Eric Clapton, Jimi Hendrix, Stevie Ray Vaughan, Mark Knopfler o el mesmu Buddy Guy.

Otramiente, el Festival Crossroad va tar presente na Selmana Negra de Xixón, onde la organización va poner chigre propiu con actuaciones a diario ente les que rescampla la de los Long Ryders el día 10 de xunetu. El Crossroad Bar va regalar tamién hasta 5.000 copies del CD promocional del certame, con cantares de tolos artistes que van tar el 23 y 24 de xunetu tocando na Plaza de Toros