El CrossRoad anuncia a Los Lobos y la Jon Spencer Blues Explosion

La organización del Crossroad Festival, el certame de rock y blues que va celebrar la so tercera edición en Xixón ente'l 21 y el 24 de xunetu, ta acabante de confirmar a dos bandes d'auténticu restallu. Los dos grupos acabante d'anunciase son Los Lobos y la Jon Spencer Blues Explosion. Los primeros, que se ficieron famosos nel mundu entero gracies a la so participación nes películes La Bamba y Desperado, van actuar na xornada del vienres, mientres que la Blues Explosion, formación renovadora del blues y del soul va facelo na xornada inaugural del xueves 21.

La organización del certame presenta a Los Lobos como una amuesa del enfotu eclecticista nesti Crossroad 05, y ye que dende l'aniciu de la so carrera musical a últimos de los 70, esta banda de Los Ángeles-California metióse pelos caminos del pop, de la música tradicional mexicana y del rock and roll, ello ensin dexar de componer bandes sonores pa películes o incluso facer música pa neños,anque foi gracies a dos películes que la banda algamó gran sonadía. Ello foi coles cintes "La Bamba" na que recuperaben temes de vieyo de Ritchie Valens, y Desperado, onde grabaron La canción del mariachi col actor Antonio Banderas. Otramiente, la banda ta acabante d'asoleyar el discu The Ride, onde cuenten coles collaboraciones de xente como Elvis Costello, Tom Waits, Richard Thompson o Mavis Staples.

Pela so parte, la Jon Spencer Blues Explosion, grupu que formen Jon Spencer, Russell Smith y Judah Bauer, amiesta'l punk, el rythm and blues o'l hip hop nun soníu propiu que foi evolucionando a lo llargo de los siete discos que lleven espublizaos. Con dos guitarres y ensin baxu, los sos directos pasen por ser de los más potentes del momentu.

L'anuncia de la contratación d'estes dos bandes vien a da-y más rellume a un cartel nel que yá taben anunciaos artistes como Little Richard, Willy DeVille, Lee Rocker, Colin James, Lucky Peterson, Eero Raittinen & The Noisy Kinda Men, The Stepbrothers, The A-Bones, The Redondos y Super Ratones.