El coronavirus torna a Asturies, con un casu na área sanitaria de Xarrio

|
Adrián Barbón y Pablo Ignacio Fernández Muñiz coronavirus Xarrio

Una asturiana que trabaya na Mariña Lucense, zona que rexistra un biltu de COVID-19, ye’l primer casu de coronavirus n’Asturies depués de más de dos selmanes llibre del coronavirus SARS-CoV-2. La paciente, con síntomes leves, ta aisllada nel so llar y tán estudiándose los sos contautos llaborales y personales.

Adrián Barbón y el conseyeru de Salú, Pablo Ignacio Fernández Muñiz, salieron esta mañana a comunicar esti casu nuevu, confirmáu anueche, que llega depués de quince díes ensin positivos –20 según los datos del Ministeriu de Sanidá– nel país. “Yá nun tamos llibres de coronavirus”, aseguró’l presidente al tiempu que llamó a la ciudadanía “a estremar les midíes d’hixene y precaución”.

“Tomaremos les decisiones que tengamos qu’adoptar nesi área pa evitar qu'haya un contaxu nuevu a nivel comunitariu”, siguió’l socialista, qu’informó del que’l casu deteutóse na área sanitaria de Xarrio. En concreto trátase d’una asturiana que trabaya n'A Mariña Lucense, onde hai un biltu con más de 35 casos, con familia nel occidente d’Asturies y centru de salú nesta zona.

Según apuntó’l conseyeru, la moza tien síntomes leves y ta aisllada nel so llar en Galicia, al igual que los sos familiares n'Asturies. Como asocede nestos casos, tán estudiándose los sos contautos llaborales y personales pa ponelos en cuarentena y evitar l’espardimientu del coronavirus, y yá s’informó a les autoridaes gallegues de la situación, que va contabilizar el positivu como propiu.

Na semeya, Barbón y Fernández Muñiz.

Contador Estadistiques