El conxuntu de fornos y testares de Faro incorpórase al Inventariu del Patrimoniu Cultural d'Asturies

|
Cerámica de Faro

La Comisión Permanente del Conseyu del Patrimoniu Cultural d’Asturies dio’l preste na so sesión del 13 de xineru a la inclusión del conxuntu de fornos y testares de Faro nel Inventariu del Patrimoniu Cultural que la Conseyería de Cultura, Política Llingüística y Turismu fixo efeutiva cola resolución espublizada esti xueves nel BOPA. Tamién incorpórense como rutes xacobees trés caminos históricos que pasen per Pravia.

Faro, nel conceyu d’Uviéu, rescampló como centru alfareru dende la Edá Media hasta avanzáu’l sieglu XX. Los oríxenes medievales de la so actividá acreitense tanto por productos cerámicos identificaos en xacimientos urbanos que, atendiendo a les sos carauterístiques y contestu, son propios d’esi tiempu, como pola escavación arqueolóxica n’El Cantu’l Rei de la base d’un fornu datáu ente lo último del sieglu XI y el XII.

Hai constancia de que nel sieglu XVIII trabayaben en Faro hasta 72 artesanos, cantidá que marcaba’l Catastru d’Ensenada, persones que compaxinaben esti llabor coles xeres del campu. La cantidá descendiera yá na centuria siguiente y nel primer terciu del sieglu XX pervivíen cuatro.

La competitividá de la lloza industrial, primero, y del vidru, depués, acabaríen cola cerámica de Faro, quedando namái dende va unes décades el secular taller de Fornaxe/Vega que caltién l’actividá gracies a José Manuel Vega ‘Selito’. Sicasí, esisten nel llugar una ventena de fornos, de los que pocos conserven la mayor parte de la so estructura, y testares qu’agora s’incorporen al Invertariu del Patrimoniu Cultural, el segundu nivel más altu de proteición namái superáu pol Bien d’Interés Cultural (BIC), cola categoría de xacimientu arqueolóxicu inventariáu.

L’espediente abrióse n’avientu del 2021. Per un añu recopiláronse informes de la Real Academia de Historia, la Universidáu d’Uviéu y el Real Instituto de Estudios Asturianos (RIDEA), asina como de la Comisión d’Urbanismu y Ordenación del Territoriu d’Asturies (CUOTA), siguiendo lo que marca la Llei de Patrimoniu Cultural d’Asturies.

Los productos más vieyos fechos nos fornos y testares de Faro consistíen en vasíes reductores con decoraciones feches con cortes na superficie, a los que s’incorporaron sieglos depués los acabaos vidriaos y, más alantre, los esmaltaos. Conócense más d’una trentena de tipos de recipientes pal usu de cocina, l’almacenxe y el serviciu de mesa, y tamién fixérones otres manufactures como teyes y cañeríes.

Con Candamu, Cuideiru y Salas

Más tiempu llevó l’espediente pa la incorporación como rutes xacobees dellos caminos históricos que pasen pel conceyu de Pravia. Nesti casu, abrióse’l 3 de payares del 2021, siguiendo’l mesmu procesu que los restos de Faro.

En concreto inclúyese nel Inventariu del Patrimoniu Cultural d'Asturies el de La Ponte Peñaflor, en Candamu, a Pravia pela barca de Forcinas; el que va de Pravia a Las Lluiñas, en Cuideiru, per Villafría; y el que se dirixe de Pravia a Maecina, en Salas, pel valle d’Arangu.

Contador Estadistiques