El Consorciu de Tresportes d’Asturies estrena una aplicación móvil na que l’asturianu nun tien presencia

El Gobiernu, al traviés del Consorciu de Tresportes d’Asturies (CTA), ta acabante d’espublizar una aplicación pa dispositivos móviles de nome ‘CONECTA’ pa facilitar l’usu de la rede de tresporte públicu nel país. Ésta ye en castellanu dafechu, ensin presencia del asturianu y del gallego-asturiano, y nun emplega la toponimia oficial.

Según comuniquen dende l’Executivu, ‘CONECTA’ permite navegar al traviés de diferentes ferramientes pa planificar viaxes multimodales per aciu de la xeollocalización de la posición del usuariu, que dispondrá d’información sobre toles paraes cercanes al so allugamientu, amás de la rellativa a les llinies y frecuencies de pasu que pue utilizar. Coles mesmes, al traviés d’un menú, muéstrense los itinerarios de caúna de les llinies y les paraes intermedies.

Nun siguiente pasu, l’aplicación permitirá también visualizar nun mapa y en tiempu real la situación de cada vehículu y el plazu estimáu de llegada a caúna de les paraes que faiga. Al furrular con Google Maps, la toponimia visualizada nel planu de ‘Paradas y horarios’ de l’aplicación nun ye la oficial, sinón la derogada, que ye tamién la qu’apaez al buscar ruta en ‘Cómo llegar’, tando presente la tradicional namás nes informaciones de la estaya 'Noticias'.

Tampoco nun fai usu del asturianu nin del gallego-asturiano ‘CONECTA’, de la que la Conseyería de Mediu Rural y Cohesión Territorial rescampla qu’ufre a los usuarios la posibilidá de solicitar yá la tarxeta monederu nueva del CTA, utilizando un sistema de reconocimientu de documentos y verificación d’identidá. Esta tarxeta unviaráse direutamente al domiciliu del solicitante, que recibirá un corréu electrónicu coles claves del área personal, onde podrá xestionar les diferentes opciones de la cuenta personal.

De momento, esta tarjeta nun ta operativa, polo que se siguirán utilizando les actuales bono 10 y abonu ‘CONECTA’. Sicasí, el CTA recomienda solicitar yá’l soporte nuevu pa poder comenzar a utilizalu cuando tea disponible.

Nel momentu en que se produza’l cambiu, dende l’aplicación podrá consultase l’históricu de viaxes fechos o recargar saldu acercando la tarjeta al terminal móvil. ‘CONECTA’ ta disponible pa la so descarga en plataformes pa sistemes Android y iOS baxo la busca ‘CTA CONECTA’.