El conseyu de la RTPA noma a Virgili direutor xeneral en funciones

Antonio Virgili, hasta agora direutor d’Antena y Conteníos de la RTPA, ye’l direutor xeneral nuevu del ente públicu de comunicación. 13 de los 14 conseyeros votaron a favor del periodista, cola astención única del representante d’IX-LV.
 
D’esta forma, Virgili sustitúi a Juan José Guerenabarrena, que’l miércoles pasáu, coincidiendo cola primer reunión del conseyu d’alministración nuevu, presentó la so dimisión. L’ex direutor d’Antena y Conteníos foi la primer opción de FAC y PSOE pa ocupar el cargu y güei tamién tuvo’l sofitu del PP. Mentes, IX-LV decidió astenese por cuestiones “formales”.
 
En declaraciones a Europa Press, fontes del PP informaron qu’apoyaron la propuesta de Foro de designar a Virgili al considerar que la sustitución de Guerenabarrena yera "uxgente" dada la "situación delicada" qu’atraviesa la RTPA. Amás, los populares consideren a Virgili un profesional "de bon perfil", "conocedor del funcionamiento de la casa". L’oxetivu último del PP ye normalizar la situación pa "que les persones que trabayen nel ente puedan cobrar" y el servicio continúe dende una perspeutiva "d’austeridá".
 
N’opinión del PSOE, Virgili goza de "un apoyu importante" pa facer les sos funciones "ensin atadures". El voceru socialista nel conseyu tamién señaló que la meyor forma de espresa-y esa confianza ye "nun pone-y nengún condicionante" a la hora d’ellaborar les cuentes. Mentes, IX-LV abogó por que tanto la RTPA como’l restu de sociedaes públiques de comunicación sían "territorios llibres d’escesos". Pa ello, cursó una petición escrita na que, amás de renunciar a les sos dietes con efeutu retroactivu, solicita que se supriman les de los conseyos d’alministración y de comunicación, y que se reduzan los altos cargos y les sos retribuciones. "Nun se pue pidir austeridá y nun predicar col exemplu", defende IX-LV.
 
Pela so parte, FAC espresó la so allegría pola ruptura del bloquéu de cinco meses que "impidiera la presencia de Foro nel conseyu" y que "ayudará a encalzar a la RTPA hacia la normalidá". Fontes del partíu de Francisco Álvarez-Cascos señalaron que confíen en que’l direutor xeneral nuevu del ente en funciones "profundice na normalización nos aspectos de la tresparencia informativa al Gobiernu y al Parllamentu". Amás, encamentaron-y a que favoreza que la RTPA "torne al camín de la normalidá informativa". Tamién a "que’l presupuestu nuevu se faiga en coherencia a un escenariu con unes esixencias d’austeridá cada vegada mayores".
 
Petición d’un alcuentru urxente con Álvarez-Cascos
 
Amás del nomamientu de Virgili, los conseyeros decidieron prorrogar la presentación del anteproyeutu de presupuestos hasta’l día 20 para que’l responsable nuevu lu revise y introduza los cambios que considere oportunos nunes cuentes que proponen menguar la subvención pública que recibe l’ente públicu de comunicación nun 21,34 por cientu pal 2012. Por último, el conseyu avaló una propuesta d’IX-LV pa solicitar una reunión urxente con Álvarez-Cascos y recibir al comité d’empresa de la RTPA.