El Conseyu de la Mocedá esixe midíes pa torgar l’éxodu de l’Asturies rural

Al rau de los datos que diere l'otru día'l Conseyeru d'Educación José Luis Iglesias Riopedre,que reconoció la perda de más del 50% del alumnáu nes escueles rurales del país, el Conseyu de la Mocedá del Principáu d'Asturies (CMPA) salió ayeri a la escena pública p'amestar la so opinión sobre la situación de los pueblos asturianos. Según el CMPA, la perda de más de la metada del alumnáu de la escuela rural dende va ocho años p'acá ye namás "la punta del iceberg d'una realidá tan preocupante como desalentadora". Ente los datos en que se tien esta afirmación, la presidenta del CMPA, Rebeca Rodríguez, remembró que l'Informe "Mocedá y Asociacionismu nel Mediu Rural Asturianu" que'l CMPA presentare va delles selmanes, yá aclariaba que munchos mozos y moces, con presentar una tendencia migratoria a les ciudaes, manifestaben la so voluntá de quedar en pueblu en casu de dase dos supuestos, que yeren la meyora de la calidá de vida y acabar col aislamientu del pueblu.

Según los datos del CMPA la mocedá rural tien un "sentimientu d'abandonu" que parte de la esperiencia de los últimos años, en que nun hebo polítiques capaces de meyorar les sos condiciones de vida.

Contra ello, el Conseyu parte de la base de que ye preciso tornar esta tendencia, pa lo que l'organismu propón unes llinies d'actuación. Asina, en primer llugar, Rebeca Rodríguez diz qu'ún de los puntos básicos ha ser el de la creación d'emplegu, faciendo un apueste seriu pola pequeña empresa y pol sofitu a la iniciativa familiar, siendo precises pa ello la esistencia d'ayudes públiques pero tamién la d'Equipos de Desarrollu Rural que dean asesoramientu pa sacar alantre estes iniciatives, dándo-y amás un papel especial dientro d'estes actuaciones a la situación de la muyer.

La creación d'una rede de comunicaciones que reduzan distancies y unos servicios públicos afayadizos ye otra de les midíes que propón el CMPA, que sorraya la necesidá de que l'alministración cumpla col so papel "redistributivu" entamando una "inversión más ambiciosa" qu'ha pasar pela meyora de l'atención a la población, el refuerzu la rede sanitaria y educativa, aumentar l'actividá social y cultural y espacios públicos de participación.

L'accesu a la vivienda ye otru de los pegoyos del CMPA pa torgar l'éxodu rural. L'organismu que dirixe Rebeca Rodríguez ve na recuperación de cases abandonaes una ferramienta fundamental pa llograr esti oxetivu al traviés de programes y iniciatives qu'amiesten emplegu y formación, casu de les Escueles Taller o los Talleres d'Emplegu, que puen ayudar a recuperar edificios al empar que dar formación.

Énte l'avieyamientu de la población rural, Rebeca Rodríguez apuntó que-y resultaba "inconcebible" que dende l'Institutu Asturianu de la mocedá nun se punxere en marcha una política específica, coordinando l'acción del Gobiernu y poniendo en marcha midíes que contribuyan a reforzar el papel de la mocedá al traviés de la creación de centros polivalentes, ayudes específiques qu'afalen l'asociacionismu xuvenil nel área rural o tamién el poner más técnicos de mocedá que coordinen actuaciones.