El Conseyu de la Mocedá presenta la XII edición de la “Escuela de Seronda”

El tradicional foru de debate qu'entama'l Conseyu de la Mocedá va acutar un foru pa falar de la oficialidá y que va correr a cargu del Conceyu Abiertu pola Oficialidá. El papel de l'asociación d'emigrantes asturianos en Madrid ASMA como vehículu de promoción cultural tamién va tener un güecu nes meses de debate.

La Escuela de Seronda ye una actividá que promueven los Conseyos de Mocedá d'Asturies, Uviéu, Xixón y Mieres, que tien como oxetivu sirvir d'espaciu de formación, reivindicación, ociu y debate sobre aquellos temas qu'afecten y qu'nteresan a la mocedá asturiana y a al so movimientu asociativu. Les sos xornaes, ponencies y meses de debate van tener llugar del 3 al 6 d'avientu nel Centru de Cultura "Antiguu Institutu" de Xixón.

Ún de los debates que van tomar más tiempu y que ye ún de los clásicos na escuela de Seronda va ser el d la participación de la mocedá nel movimientu asociativu. Asina, baxo'l títulu "Querer, saber y poder. Conxugaciones na participación xuvenil" la escuela va acutar dos díes pa falar del conceptu de participación y el papel qu'han xugar nello los movimientos sociales, ciudadanía y alministración pública.

Xunta estos debates llargos, la Escuela acuta espaciu pa debates y presentaciones d'un día . Ente elles rescampla la celebración el vienres 2 del foru "ASMA como vehículu de promoción cultural" nel que va recoyese la esperiencia de los últimos cuatro años de l'asociación ASMA (Asturianos en Madrid) qu'axunta a la emigración más mozo y que vien organizando d'entós p'acá actividaes culturales y recreatives cola intención de promover y esparder la obra d'artistes, intelectuales y creadores d'Asturies nel gran escaparate madrileñu. Col envís d'ufiertar los sos servicios como vehículu de promoción cultural, ASMA va ser oxetu de debate sobre la utilidá que puen tener colectivos d'esta triba pa impulsar el conocimientu de la cultura asturiana nel esterior.

Otru d'estos foros d'ún día va ser el que se-y dedique a l'actualidá sobre la llingua asturiana. Baxo'l títulu "La Oficialidá de la Llingua Asturiana. Una Reivindicación ente la Prósima Reforma Estatutaria" esti foru, que va tar organizáu pola plataforma Conceyu abiertu pola Oficialidá, va analizar a lo llargo del sábadu 3 dende puntos de vista estremaos como son el del marcu llegal, el de la presencia real y el de la vitalidá del idioma, la reivindicación de la oficialidá y perspectives ente la prósima reforma del estatutu d'autonomía. El conflictu del Sahara Occidental, que lleva 30 años allancáu tres de la creación nel 1975 de los campamentos de Tindouf, la Situación de les artes emerxentes, nun debate organizáu por Ánxel Nava y Mª José Baragaño oun alcuentru de ex voluntarios europeos que van falar sobre la implantación del Serviciu Voluntariu Européu son otros de los foros d'esta XII Escuela de Seronda

Otramiente, el foru "L'Axenda feminista y los debates inacabaos" que va tomar el domingu 4
proponse como un espaciu de reflexión nel qu'abordar temes poco o nada contemplaos dende'l feminismu institucional y l'académicu, col oxetivu d'avanzar llinies estratéxiques d'actuación dende l'ámbitu xuvenil y l'asociacionismu.


La Escuela de Seronda va tener otros foros que van ser zarraos como ye'l casu del que va tratar sobre "El discursu social sobre la reducción de riesgos en consumu de droga" que va llevar alantre'l grupu "Zona Clave" d'Asturies o l'alcuentru d'educadores pa la evaluación del programa d'educación sexual

En tou casu cada foru va tener 25 participantes, preferentemente representantes d´asociaciones xuveniles, conceyales, técnicos de mocedá y profesionales que desenvuelven el so llabor n´estayes rellacionaes colos conteníos que se dean en cada foru, o xóvenes en xeneral que tean interesaos/es na temática de los mesmos.