El Conseyu de la Mocedá entama trés cursos sobre educación sexual

‘Educación Sexual con Arte’ ye’l nome del ciclu de cursos de 14 hores qu’entama’l Conseyu de la Mocedá del Principáu d’Asturies (CMPA) n’Uviéu y Xixón. Los cursos tán dirixíos a coleutivos xuveniles y xente mozo, y son de baldre.
 
En total son trés les actividaes que van desarrollase de baldre nos meses d’ochobre, payares y avientu. La primera, con sede n’Uviéu, va tener llugar los díes 6, 7 y 8 d’ochobre y lleva’l nome de ‘Sexualidad: cuerpos, relaciones interpersonales y comunicación de los deseos’. Maribel Sánchez, socióloga, esperta en feminismu y mediadora; Isabel García, maestra, psicopedagoga y mediadora; y Ángela Kethor Soto, psicóloga, sexóloga y mediadora, toes elles pertenecientes al grupu de salú del CMPA, van ser les responsables d’esti cursu.
 
El Conseyu de la Mocedá de Xixón va acoyer el 10, 11 y 12 de payares la segunda cita de ‘Educación Sexual con Arte’, que tien por títulu ‘Sexualidad: la construcción del género. El aprendizaje de las identidades’. Nella Pilar Sampedro, psicóloga, sexóloga y feminista, y Carlos Lomas, profesor d’educación secundaria y escritor, van ser los encargaos de dirixir los distintos talleres y actividaes del cursu. Por último, el 15, 16 y 17 d’avientu va celebrase n’Uviéu ‘Por los buenos tratos: una experiencia de intevención con jóvenes’, que va correr a cargu de Noemí Parra, trabayadora social y antropóloga.
 
Tolos cursos van celebrase nel horariu de 17 a 20 hores, el xueves; de 10 a 14 hores y de 17 a 20 hores, el vienres; y de 10 a 14 hores, los sábados, y los alumnos y alumnes que participen nel 80 por cientu de les actividaes van recibir un certificáu d’asistencia al cursu. Les persones que quieran participar en cualisquier actividá de ‘Educación Sexual con Arte’ pueden facelo a traviés de la web del CMPA.