El Conseyu de Gobiernu refugó la mina en Salave

La sesión del Conseyu de Gobiernu del Principáu d'Asturies, que se celebró esta mañana n'Uviéu, apautó'l denegar el permisu pa la esplotación minera aurífera que la compañía del Canadá Río Narcea Gold Mines tenía solicitada en Salave, conceyu de Tapia.

L'acta del Conseyu de Gobiernu diz que la empresa solicitaba del Gobiernu asturianu l'aplicación de la discrecionalidá y que se fexere nel so casu una escepción a la protección mediuambiental de la costa asturiana que se prevé na normativa asturiana. El Conseyu de Gobiernu a propuesta de la conseyería de Mediu Ambiente, Ordenación del Territoriu y Infraestructures, decidió a la fin que nun procedía l'aplicación d'escepcionalidá nenguna en cuantes que los daños mediuambientales y al paisaxe diben ser irreparables y ensin torna posible.

La decisión del Conseyu de Gobiernu sobre la concesión de permisu a la mina a cielu abierto que Río Narcea quier entamar na costa occidental asturiana vien nun momentu tensu enforma tres de que los grupos de la oposición en Conceyu de Tapia pidieren esta mesma selmana un segundu plenu escepcional en rellación al asuntu de la mina, ello dempués de qu'una manifestación de vecinos afectaos se concentrare a la puerta de la Casa Conceyu pidiéndo-y al rexidor Gervasio Acevedo qu'entainare n'aplicación de midíes contra los llabores de sondéu que la empresa taba faciendo ensin permisu nel llugar d'Os Llagos de Silva.