El Conseyu de Gobiernu pon el nomamientu oficial de Pérez Ornia pal día 31

El viaxe del presidente Álvarez Areces a Llusemburgu forzó l'adelantu del habitual Conseyu de Gobiernu de los xueves a güei, resultando una sesión curtia en conteníos y resoluciones. Ente los temes trataos na sesión d'esta mañana y de los qu'informó la Conseyera de Cultura y portavoz del Gobiernu Ana Rosa Migoya rescampla la ratificación nel cargu de director del énte autonómicu de comunicación del sierense José Ramón Pérez Ornia, que va acceder al cargu'l día 31, día apautáu pa facer la toma de posesión oficial. Un informe sobre la Conferencia Sectorial d'Asuntos Locales y el decretu pol que se regulen les fueyes de reclamaciones a disposición de consumidores y usuarios foron los únicos asuntos que despachó'l Conseyu sacantes la cuestión de la TV autonómica.

Na rueda de prensa posterior la Conseyera faló tamién d'otres cuestiones como la situación de los músicos de la OSPA, que-y solicitaron una reunión y a los que remitió a la mesa negociadora, pero'l gran ausente de les resoluciones del Conseyu de Gobiernu foi'l Plan de Normalización Llingüística. El documentu, qu'obra en poder de Conseyería de Cultura y pal que se comprometiere verbalmente la so aprobación pa les primeres selmanes del añu, sigue ensin pasar pel órganu