El Conseyu de Gobiernu dió-y el preste al Salariu Social

El Conseyu de Gobiernu d'ayeri aprebó l'anteproyectu de llei del Salariu Social Básicu, ún de los puntos del alcuerdu de gobiernu ente IX-BA y PSOE que más costó sacar alantre. Asturies ye la quinta comunidá autónoma española en tener una midida d'esti calter.


L'anteproyectu de Llei del Salariu Social Básicu, qu'agora va pasar a discutise y aprebase en Parlamentu, presenta na so esposición de motivos el "reconocer el derechu fundamental de la persona a los recursos y prestaciones suficientes pa vivir de acordies cola dignidá humana, y l'establecimientu pol Principáu d'Asturies de los medios afayaizos de prevención y llucha contra la exclusión social nel so ámbitu territorial" como razón de ser.

El Salariu Social preséntase como una ayuda subsidiaria a otras prestaciones y complementaria n'aquellos casos nos que nun se cuente con unos ingresos mínimos vitales. Según les estimaciones de la Conseyería de Bienestar Social y Vivienda, esta midida nueva podría beneficiar a 7.000 persones n'Asturies, una cifra que sal d'echar cuentes colos 60 millones d'euros que va tener de financiación d'equí a cuatro años. Según la conseyera Laura González, la so estaya de gobiernu máecase'l plazu de facer efectivos los primeros pagos de la prestación a últimos d'esti mesmu añu. En cuantes a la cuantía de les ayudes, Laura González esplicó que la mínima individual va tar alredor de los 365 euros al mes y la másima, pa families de seyes persones, va ponese nos 602 euros al mes.

Tres de Cataluña, Navarra, Madrid y el País Vascu, Asturies va ser la quintacomunidá autónoma en disponer d'una ayuda d'esti tipu, qu'enancha l'ámbitu d'actuación y el presupuestu del Ingresu Mínimu d'Inserción. Laura Gonzáles calificó la entrada en serviciu del Salariu Social como "un plan d'inclusión social que pon a Asturies a la cabeza del conxuntu de les comunidaes autónomes"