El Conseyu de Gobiernu aprobó la toponimia de Pezós

El Conseyu de Gobiernu del Principáu d'Asturies dio-y el preste, na so sesión d'esti xueves 29 de marzu, al espediente toponímicu del conceyu de Pezós. El reconocimientu de los nomes tradicionales de llugar d'esti conceyu del occidente astur amiéstase a los otros 19 conceyos que tienen yá oficializada la so toponimia y ye'l sestu espediente toponímicu de conceyu que pasa esti trámite dempués de que la selmana pasada s'aprobare l'espediente del conceyu de Ribadeva y de que nel mes de xineru recibieren el preste oficial los de Nava, Xixón, La Ribera y Colunga. 13 espedientes toponímicos más alcuéntrense en "fase avanzada de tramitación" tando yá remataos pola Xunta Asesora de Toponimia y col preste de los conceyos, ello nuna llexislatura na que la Xunta Asesora de Toponimia trabayó con un total de 52 conceyos distintos.