El Conseyu de Gobiernu aconceya col Plan de Normalización fuera del orde del día

L'orde del día de la Xunta de Gobiernu del Principáu de güei nun incluye la presentación del Plan de Normalización ellaboráu pola Oficina de Política Llingüística, pero nun se descarta que la Conseyera de Cultura acuda a la sesión ordinaria del Conseyu de Gobiernu col documentu del plan.

Sigue la dulda sobre la fecha de l'aprobación del Plan de Normalización del Asturianu en Conseyu de Gobiernu. Según pudo saber Asturies.com, l'orde del día del Conseyu de Gobiernu de güei xueves nun incluye ente los sos puntos la presentación d'esti plan, anque fontes del Gobiernu asturianu nun descarten que la Conseyera de Cultura pueda presentar el plan fuera del orde del día.

L'Aprobación del plan ye, xunta la normalización de la toponimia y l'afitamientu de la rede de normalización en conceyos un de los trés pegoyos en que la oficina de Política Llingüística tien puestos los sos enfotos pal 2005. Ramón d'Andrés, responsable de la Oficina, confirmó que'l plan yá ta en manes de la Conseyería y que la fecha d'aprobación del mesmu nun depende del so departamentu. L'aprobación del plan, prevista pa últimos del 2004, retrasóse hasta primeros del 2005, y en teoría esti primer conseyu de gobiernu de dempués del parón por navidaes había tratar de la cuestión.