El Congresu aprobó la Llei d’Enseñanza col únicu votu en contra del PP

El Plenu del Congresu de los Diputaos aprobó esta mañana'l Proyectu de Llei Orgánica d'Educación (LOE) col votu al favor de los diputaos de Partíu Socialista Obreru Español, Convergencia i Unió, Esquerra Republicana de Catalunya, Partíu Nacionalista Vascu, Iniciativa per Catalunya - Verts, Coalición Canaria y Eusko Alkartasuna, el votu en contra en solitario del PP y l'abstención de los representantes d'Izquierda Xunida, Bloque Nacionalista Galego, Chunta Aragonesista y Nafarroa Bai.

La previsible aprobación del testu féxose al día dempués d'una xornada de fuelga na enseñanza convocada por organizaciones opuestes al proyectu de llei y que n'Asturies tuvo un siguimientu del 40% en primaria y del 80% en secundaria según les organizaciones convocantes, mientres que la Conseyería mengüó eses cifres hasta'l 1'7%. La protesta remató con una manifestación que se celebró ayeri n'Uviéu al favor de la escuela pública y contra la Llei Orgánica d'Educación y que rexistró una asistencia que la Policía peritó en cerca de 1.000 persones, mientres que la organización faló de más de 8.000, contando cola participación de les organizaciones enxertes na plataforma pola escuela pública, ente elles SUATEA, Sindicatu d'Estudiantes, CSI, IAS, CCOO d'enseñanza y otres. La marcha tuvo encabezada ente otros por dirixentes de d'IX que recibieron les crítiques de miembros d'otros colectivos participantes pola falta de definición na so postura contraria a la LOE.