El Concursu de Cartes d’Amor d’Ayer sigue col plazu abiertu a la participación

El certame ta abiertu a la presentación de testos n'asturianu y castellanu y reparte más de 1.000 euros en premios y estancies nel hotel rural Ca'l Xabú. La web de la oficina Xuvenil de Morea d'Ayer tien pa descargar les cartes ganadores d'otres ediciones pa que-yos valgan d'inspiración a los aspirantes.

Marisa López Diz de Xixón y Xabel de Cea Gutiérrrez, de Llanes, ganaron nel 2005 na modalidá d'asturianu d'esti concursu nel que'l llargor de los trabayos nun ha pasar d'una fueya DIN-A4 escrita per una cara, y pal que los trabayos han presentase triplicaos xunto con un sobre zarráu, ensin identificación esterior y guardando los datos del autor o autora. Los trabayos han unviase a les señes de la Oficina d'Información Xuvenil d'Ayer, asitiada na Avenida Tartiere, 32. 33670 - Morea d'Ayer - Asturies - España, conseñando nel sobre "Novenu concursu de cartes d'amor".

El plazu d'almisión va tar abiertu hasta'l día de San Valentín, el 14 de febreru del 2006, y los premios son de 250 euros pal meyor trabayu y 190 pal segundu clasificáu nes dos categoríes, más otros 190 pa la meyor carta d'empadronaos n'Ayer, amás d'una flor y una estancia de fin de selmana nel Hotel rural de trés estrelles Ca'l Xabú, en réxime d'agospiu y almuerzu pa dos persones y con una ruta senderismu guiada pel conceyu d'Ayer. Pa cualquier dulda o consulta, la Oficina Xuvenil tien una páxina web onde puen vese cartes d'otros años amás d'una dirección de corréu electrónicu y el tlf 985 48 12 04