El conceyu L.lena prepárase pa les obres de la variante

La Pola L.lena prepara la infraestructura del conceyu p'acoyer les obres de la tan esperada obra ferroviaria.

Dempués de les declaraciones de la ministra de Fomentu Magdalena Álvarez nes qu'aseguraba qu'había que revisar munches alxudicaciones porque teníen numberosos fallos, en muncho ambientes de la sociedá y la política asturiana había un ambiente de desconfianza si sería d'ésta o non cuando se faiga la obra definitivamente. Agora paez qu'adulces va dándose pasos pa llevar alantre una de les más importantes obres públiques d'Asturies, la variante de Payares. Nel conceyu L.lena ta acabantes d'aprobar un nuevu diseñu y equipamientu pal tendíu eléctricu. El nuevu tendíu aereu de media tensión va tener una potencia de 30 kilovatios (KW), y va ser vital pa poder atender la demanda d'enerxía que va suponer la obra de la variante. El proyectu d'Electra de Viesgo ta aprobáu pol conceyu y agora namás-y queda que la Conseyería d'Industria Comerciu y Turismu lu de de pasu.