El Conceyu d’Escritores Asturianos entrevistóse col PP de Xixón

Humberto González, Milio Cueto, Xosé Nel Riesgo o Xandro Martino Ruz son los nomes más conocíos pol públicu dientro del equipu del Conceyu d'Escritores Asturianos que ta entamando una actividá que quier facese un referente dientro de la vida cultural de Xixón. Entovía ensin un nome "comercial" definíu pal plan que pretenden llevar alantre, el Conceyu d'Escritores Asturianos quier desenrrollar una selmana d'actividaes culturales y lúdiques rellacionaes cola lliteratura n'asturianu que faigan de de Xixón un referente de l'actividá cultural del país.

Según esplicó a Asturies.com Humberto González, el proyectu que ta intentando sacar alantre'l Conceyu d'Escritores Asturianos quier dir más alló d'una selmana d'actividaes culturales al usu, y pa ello márquense dos oxetivos. El primeru ye'l de que les actividaes a desarrollar lleguen realmente a la sociedá. Pa ello, los escritores aplíquense aquello de que cuando Mahoma nun va pal monte el monte tendrá de dir pa contra Mahoma, y proponen llevar sacar el 90% de les actividaes a la cai, llevándoles a llugares que yá tengan otros usos sociales como cines, centros municipales, les escueles o mesmamente la cai. El segundu oxetivu que se marca'l Conceyu d'Escritores asturianos ye'l de facer d'esta Xunta'l tercer acontecimientu cultural de la ciudá de Xixón, asitiándola como ún referente xixonés nesti terrén xunta la Selmana Negra y la Selmana del llibru iberoamericanu. Precisamente la esistencia d'estos dos acontecimientos foi ún de los factores que llevaron al Conceyu d'escritores a escoyer Xixón, amás de por ser tamién la mayor ciudá del país y la que podía ufiertar unes infraestructures que son les más afechisques pa una actividá que tamién quier ser periódica.

Los responsables del PP de Xixón, cola conceyala y senadora Pilar Fernández Pardo al frente, dixeron tar mui interesaos na iniciativa, pa la qu'ofrecieron el "apoyu total" de l'agrupación. El Conceyu d'escritores va presenta-yos agora'l so plan tamién a los otros dos grupos políticos con representación na casa conceyu xixonesa, tando yá apautada la entrevista con Carmen Rúa (IX-BA) pa la selmana qu'entra. Humberto González señaló tamién que la iniciativa que propón el Conceyu d'escritores sedría mui barata, calculándose'l coste de toles actividaes en dalgo menos de 23.000 euros pa toa una selmana. Como fecha orientativa pa echar a andar la primer "selmana", el Conceyu márcase la d'ochobre del 2006.