El Conceyu de Xixón mengua la cooperación internacional al desarrollu en 700.000 euros

Los presupuestos del Conceyu de Xixón destinarán a la cooperación internacional al desarrollu 300.000 euros, lo que supón 700.000 euros menos que n’años anteriores. Compromisu por Xixón critica esta midida de Foro.

La federación de partíos considera “inadmitible” la reducción importante nesta partida nel borrador de los presupuestos municipales del 2013, que nun cumple “col compromisu moral de 0,7 por cientu”, y acusa a la derecha d’aprovechar la crisis pa executar la so “axenda oculta, onde ensin dulda ta la eliminación de les ayudes a los pueblos y persones más necesitaes”. La intención de Foro Asturias Ciudadano ye la de destinar estes perres a gastos sociales, dalgo que tampoco ye escusa pa Compromisu, que recuerda l’aumentu del dineru destináu a les lluces navidiegues o’l gastu na Davis Cup. Daniel Fernández, voceru de la organización, afirma qu’estos dos exemplos son una demostración “de que les prioridaes polítiques esisten y el gobiernu de Foru prefier poner más lluces de Navidá pa celebrar valores como la solidaridá que prauticalos, dientro del cinismu políticu que carauteriza la xestión de Carmen Moriyón”.

“Hai que caltener, a lo menos, el compromisu de 0,7 por cientu n'ayuda al desenvolvimientu y encamentamos tantu al Foru como al PP que nesta dómina de crisis que tamién ta afeutando, más si cabe, a les zones menos desenvueltes económicamente pol amenorgamientu xeneralizada d'ayudes, a que nun utilice la mano dura contra lo más probes, mientres miren pa otru llau ante los escesos y abusos de los más fuertes” conclúi Fernández. El gastu del Conceyu de Xixón en cooperación internacional al desarrollu yá foi polémicu l’añu pasáu pola decisión de Foro de Ciudadanos, col sofitu del PP, de dexar fuera de les ayudes a Cuba, país que tradicionalmente recibía la solidaridá de la ciudá.