El conceyu de Siero aprobó una moción pidiéndo-y a la Xunta Xeneral del Principáu la oficialidá del asturianu na reforma del estatutu

El Plenu del Conceyu de Siero aprobó ayeri una moción presentada pola Xunta Pola Defensa de la Llingua Asturiana na que se-y pide a la Xunta Xeneral del Principáu que declare la oficialidá del asturianu na próxima reforma del estatutu. El testu contó colos doce votos al favor de los grupos del Partíu Popular, Izquierda Xunida y Conceyu, mientres que los ocho conceyales del PSOE votaron en contra. Nel conceyu de Samartín del Rei Aurelio debatíase tamién ayeri otra moción asemeyada, presentada por una iniciativa cívica col aval de más de 500 firmes. Nesti casu, los votos al favor de PP y IX nun pudieron cola mayoría absoluta del PSOE, que xustificó'l so votu negativu por "coherencia cola postura de la FSA" y porque "nun ye'l momentu más afayadizu" pa presentar una moción d'estes característiques.

Una argumentación asemeyada gastaron los representantes socialistes en Siero pa votar contra la moción. La cercanía de les próximes elecciones, que van suponer un nuevu repartu políticu y l'entamu dempués de les mesmes del procesu de reforma del estatutu foron los principales argumentos colos que defendieron los socialistes de Siero, representaos pola so portavoz Eva Sánchez, pa refugar una moción de la que'l conceyal del PP José Antonio Noval fexo una defensa encesa, calificándola de necesaria pa la supervivencia de la identidá cultural asturiana y en cuantes que reconocimientu d'un derechu. Los conceyales d'IX, Marta Pulgar y Nicolás Fernández, y el representante de Conceyu, Rafael Paulino Rodríguez, dieron tamién el preste a la moción, defendida nel plenu en nome de la Xunta pola Defensa de la Llingua pol militante de l'asociación Sidoro Villa.

La negativa del PSOE a aprobar les mociones nos dos conceyos túvose siempre n'argumentos de falta d'oportunidá y obediencia a los postulaos políticos de la FSA, contraria dafechu nestos momentos a la oficialidá, pero los conceyales socialistes de los dos ayuntamientos nun llegaron en a cuestionar el fondu de los documentos que se presentaben. A la contra, el PP, anque matizó nel plenu celebráu en Sotrondio que'l so apoyu a la oficialidá faise siempre dende la perspectiva de la non obligatoriedá de la llingua, apeló a los derechos cívicos y la defensa de la cultura asturiana como exes de les mociones presentaes. L'escritor Xulio Arbesú, que faló nel plenu de Samartín del Rei Aurelio en nome de la plataforma cívica que presentaba la iniciativa, emponderó'l cambéu de posición del PP respective al asturianu y declaróse convencíu de que'l PSOE "va acabar faciendo lo mesmo". Oportunidá de cambiar el sentíu del votu van tenela los socialistes de Samartín, en cuantes que la plataforma cívica nun descarta volver a presentar moción a favor de la oficialidá en pasando les elecciones.