El conceyu de Muros de Nalón pidió la oficialidá del asturianu y del gallego-asturianu

El Conceyu de Muros de Nalón aprobó ayeri una moción del grupu Cambiu Sieglu XXI (CSXXI) na que se pide "la oficialidá pal asturianu y el gallego-asturianu nos territorios onde se falen". La moción, que se presentó como una declaración contraria a les iniciatives que dende Galicia faen por esparder l'idioma de la comunidá vecina n'Asturies y p'atayar los intentos espansionistes del BNG, contó col votu unánime a favor de tolos conceyales qu'asistieron al plenu, los 5 del PSOE, 3 de Cambiu Sieglu XXI y el conceyal del PP.

La moción que presentó l'agrupación independiente Cambiu Sieglu XXI espresa la "refuga a toles iniciatives que nos caberos meses vienen entamando grupos políticos y culturales de Galicia que tienen por oxetivu esparder la llingua y el territoriu gallegos" y la so presentación en Muros xustifícase por ser esti'l primer conceyu del occidente asturianu y polo tanto ún de los que tan espuestos a estos intentos que vienen de la otra parte del Eo. Na moción afítase que "tolos conceyos que formen la nuestra autonomía son dafechu asturianos y asina lo amuesa la so voluntá" afirmándose darréu que "nun ha consentise intrusión nenguna en decisiones que-y correspuenden al Principáu en toles polítiques y tamién nes llingüístiques". Por ello y pa que les llingües d'Asturies sigan vives y tengan la mesma reconocencia l'agrupación pidía na so moción que'l Conceyu de Muros esixere "la reconocencia como oficiales de la llingua asturiana y del gallego-asturianu nos territorios onde se falen".

El testu de la moción, que se-y entregó al conceyu acompañáu d'un exemplar de llibru "El marcu llegal del asturianu" obra del profesor de derechu José Manuel Pérez, pidía tamién que se creare un serviciu de normalización pal conceyu.

La moción de Cambiu Sieglu XXI recibió'l votu a favor de tolos partíos representaos en conceyu, dalgo que-yos sorprendió a los mesmos representantes de l'agrupación independiente en cuantes qu'esta foi la segunda moción que-yos aprobó'l plenu de Muros nos más de cinco años que lleven con representación na casa conceyu, un tiempu nel que lleven presentaes más de cien iniciatives y mociones que, como los mesmos representantes de CSXXI llamenten, les más de les vegaes nun se tomen en consideranza por parte de los demás grupos representaos na casa conceyu.

L'alcaldesa en funciones Carmen Arango, del PSOE, declaró nel trescursu del plenu qu'anque nun taba d'alcuerdu cola histeria creada pola cuestión tampoco lo taba coles propuestes espansionistes del Bloque Nacionalista Gallegu. Dempués de facer mención a la moción aprobada apocayá na Xunta Xeneral na que se reconoz "l'asturianía incuestionable de los conceyos del occidente asturianu" l'alcaldesa socialista de Muros declaró que diba votar al favor de la moción de CSXXI, anque aclariando que "anque yo nunca diba votar al favor del asturianu, fáigolo porque nun me queda más remediu".