El Conceyu de Mieres convoca’l XXVIII Premiu Teodoro Cuesta de Poesía

|
El Conceyu de Mieres convoca’l XXVIII Premiu Teodoro Cuesta de Poesía

El Premiu Teodoro Cuesta de Poesía, ún de los más prestixosos de la nuesa lliteratura, algama la so ventena octava edición. El Conceyu de Mieres ta acabante d’anunciar la convocatoria del mesmu, con una recompensa de 4.000 euros pal ganador y col 31 d’ochobre como plazu máximu pa presentar los poemarios.

Los orixinales entregaránse en mano o per corréu certificáu na secretaría de la Casa de Cultura Teodoro Cuesta, asitiada na cai Manuel Llaneza númberu 8 (33600, Mieres del Camín), ente’l 1 y el 31 d’ochobre. El fallu del premiu, del que foi ganador na edición pasada Xuan Bello con ‘Les isles inciertes’, será un mes depués.

Ente los compromisos del vencedor pa llevar el premiu de 4.000 euros ta la participación nel programa 'Alcuentros col autor', del Club de Llectores Atenéu de Turón, y la presentación del poemariu na propia casa cultura mierense cuando tea espublizáu. Ente los compromisos de la organización, amás de la recompensa económica, ta la promoción de la obra pal so asoleyamientu por una editorial.

El palmarés d’esti gallardón, amás del de Bello, inclúi nomes tan destacaos como’l de Berta Piñán, Lourdes Álvarez, Antón García, Xuan Santori, Marta Mori, Vanessa Gutiérrez, Pablo Texón o Pablo Rodríguez Medina, ente otros.

Contador Estadistiques