El Conceyu de L.lena presenta una guía billingüe sobre’l románicu

"El románico en L.lena y Mieres" ye'l llibru del llicenciáu n'Historia del Arte Maximino Pando Macías (Mieres 1976) que se presentó ayeri oficialmente en L.lena. Col subtítulu de "Templos na ruta de pelegrinación a San Salvador d'Uviéu" trátase de la primer obra monográfica sobre l'arte del románicu nestos dos conceyos, y ye qu'esti llibru, que recupera lo más interesante de la tesis doctoral del autor, fai un recorríu pelos templos románicos que van espardiéndose a dambos llaos del camín de peregrinación a la catedral uvieina dende'l Puertu Payares hasta la salida de Mieres pa Uviéu.

Con un trabayu de campu mui grande "El románicu en L.lena y Mieres" asoleya'l resultáu d'investigaciones sobre documentos inéditos que permiten datar l'orixe de los monumentos y apreciar les rellaciones qu'esisten con otros templos románicos dela redolada, prestándo-yos especial atención a templos como'l d'Uxo en Mieres, la Colexata d'Arbás, o San Antolín en Sotiel.lu, el remocicáu de San Martino y el de desapaecíu de San Xuan de Mieres.

Ediciones Azucel ye la casa editora d'esta obra que financió'l Conceyu de L.lena y que presentó l'autor acompañáu pol alcalde de Lena Hugo Morán, la conceyala de Cultura, Paz García, la caderalga d'Historia del Arte de la Universidá d'Uviéu y especialista n'arte medieval María Soledad Álvarez Martínez, y el director d'Azucel, Celso Díaz López. "El románico en Lena y Mieres" ye una de les primeres obres sobre historia del arte que s'asoleyen n'Asturies n'edición billingüe asturianu-castellanu y que lo faen amás con vocación de ser un preséu útil pa los turistes, presentando l'encarte d'una guía turística y una serie de mapes de los dos conceyos, ello ensin arrenunciar a ser una obra seria.

L'autor, Maximino Pando Macías, ye llicenciáu n'Historia del Arte pola Universidá d'Uviéu. Foi Becariu Erasmus na Universidá Suor Orsola Benincasa, de Nápoles (Italia) y fexo'l doctoráu na universidá asturiana precisamente sobre'l tema que trata la obra acabante de presentar. La traducción del testu al asturianu corrióal cargu del serviciu de normalización de L.lena, que tien por responsablea Penélope Miranda.