El Conceyu Abiertu pola Oficialidá ve una “actitú positiva” nos grupos parllamentarios

Según comentó a Asturies.com Fernando Ornosa, representante del Conceyu Abiertu nes entrevistes d'esta mañana, apréciase una bona disposición por parte de los trés grupos parllamentarios (PSOE, PP y IX-BA) a la hora de falar del reconocimientu de la oficialidá nel Estatutu d'Autonomía, anque la percepción de cada grupu políticu presenta diferiencies importantes.

Asina, por parte d'Izquierda Xunida - Bloque por Asturies, la diputada Noemí Martín sorrayó-yos a los representantes del CAO'l compromisu de la so organización política por consiguir la oficialidá na reforma estatutaria, mientres que por parte de los sos socios de gobiernu la rempuesta foi más tibia. Asina, en pallabres de José Luis Montes, antiguu conseyeru d'educación, ha reconocese que "nunca se tuvo tan cerca de la oficialidá" pero pal diputáu socialista nun ta tan claro que se vaya a consiguir en cuantes que'l grupu socialista mándase poles disposiciones y conclusiones de los congresos de la FSA, qu'entovía nun fexo pronunciamientu nengún al favor d'ello.

Pela parte del PP recibieron a los representantes del CAO los diputaos Joaquín Aréstegui y Rodrigo Grossi, que-y tresmitieron al Conceyu Abiertu que'l so partíu "nun tien una posición zarrada" nel tema de la oficialidá pero que trabayen más cola idea d'una "oficialidá nel tiempu" que d'un reconocimientu inmediatu de la mesma.

Según Fernando Ornosa, que destacó l'actitú "positiva" de los trés grupos, el siguiente pasu del CAO va ser el de pidir reuniones coles executives de los trés partíos políticos representaos na Xunta Xeneral, solicitando entrevistes "al más altu nivel" nes que quieren tener presentes a Javier Fernández pol PSOE, a Ovidio Sánchez pol PP y tamién a la Executiva d'IX-Bloque. Según Hornosa, anque IX-BA sían yá miembros del CAO y tengan un compromisu activu cola oficialidá ye preciso falar colos sos dirixentes en cuantes que'l ser miembros de gobiernu pue facer qu'adopten una posición "tibia" nel momentu de les negociaciones.