El Conceyu Abiertu pola Oficialidá entama'l llabor nel añu 2006

El Conceyu Abiertu Pola Oficialidá convoca güei miércoles 25 a les 7 y media de la tarde una asamblea nel Auditoriu d'Uviéu na que tan llamaes a participar les yá más de 120 asociaciones, organizaciones y colectivos políticos, sindicales y culturales que firmen el manifiestu de la plataforma entamada nel so día pola Xunta Pola Defensa de la Llingua y que protagonizó l'añu pasáu dos grandes movilizaciones cíviques al favor de la oficialidá del asturianu na reforma del Estatutu d'Autonomía. Coincidiendo agora col entamu del procesu pa la reforma estatutaria, el CAO quier valorar la última movilización ciudadana celebrada en payares, analizar la situación actual de la reivindicación llingüística y decidir que nueves actividaes se ve preciso facer. Esta primer reunión nel 2006 del conceyu unitariu pola oficialidá tamién va tratar una cuestión más de fondu nun contestu de crecimientu de la plataforma como va ser el ratificar una estructura organizativa nueva que-y dea más operatividá y eficacia al llabor del CAO.