El Conceyu Abiertu Pola Oficialidá entama actividaes en Mieres y Avilés

El Conceyu Abiertu pola Oficialidá, la plataforma na que s'inxerten más de cien organizaciones polítiques, sindicales y culturales col oxetivu de que se recueya la oficialidá del asturianu na próxima reforma estatutaria, va llevar alantre estos díes un intensu llabor dientro de les sos campañes de concienciación social. Avilés y Mieres van ser los llugares onde se centre l'actividá del CAO.

Per una parte, el CAO tien abierta n'Avilés una esposición que baxo'l títulu "amuesa pola oficialidá" axunta obra de creadores como Fernando Alba, Adolfo Manzano, Pablo Maojo, Alejandro Mieres, Ricardo Mojardín, Ánxel Nava, Hugo O'Donnell, Gustavo Ordiz, Adelaida Ovana o César Ripoll ente otros munchos hasta facer una llista de más de 50 artistes. Les obres, que tan espuestes hasta'l prósimu día 2 de xunu nel Palaciu de Valdecarzana, na Cai La Ferrería d'Avilés, van vendese nuna puya benéfica al favor de la organización que va tener llugar el sábadu 3 de xunu a les 7 de la tarde nel mesmu muséu avilesín.

La esposición ye complementaria tamién d'una nueva edición de la "caravana pola oficialidá" marcha de coches en caravana informativa y de repartu de propaganda que yá se celebró en Siero y na Cuenca del Nalón y que va llegar a Avilés esi mesmu sábadu 3 de xunu.

Enantes d'ello, la caravana va andar esti sábadu 27 de mayu per Mieres, saliendo a les 10 de la mañana del Campus Universitariu de Barreo pa pasar per Santuyano, Figareo, Turón, Urbiés, Ablaña, Muries, Ruturbiu y la villa de Mieres. Como complementu a la caravana, dende les 6 de la tarde van facese en parque Xovellanos actividaes culturales pa neños y neñes y actuaciones musicales con grupos folk y canción asturiana, espurriéndose la folixa reivindicativa hasta'l barriu de Requexu, tradicional llugar d'espardimientu de Mieres.