El Conceyu Abiertu axunta a la sociedá civil y enfótase en que PP y PSOE reconozan la oficialidá

Partíos políticos, sindicatos, asociaciones xuveniles y culturales tan yá presentes na gran plataforma abierta que trabaya col únicu oxetivu de conseguir la oficialidá del asturianu na prósima reforma estatutaria.

Pilar Fernández González y Fernando Álvarez Balbuena foron los encargaos de presentar por parte de la Xunta pola Defensa de la Llingua, entidá promotora del Conceyu, a los más d'ochenta firmantes, ente los que tan toles centrales sindicales del país, grupos musicales, asociaciones xuveniles y un bon garapiellu de partíos políticos ente los que s'echa a faltar a los dos grandes de la política asturiana: PP y PSOE. Si bien cierto ye que pola banda del PSOE firmen el manifiestu les Mocedaes Socialistes y qu'ente los firmantes ta tamién el "Círculu de Pensamientu lliberal" entidá formada mayormente por militantes del PP, la firma de los dos grandes partíos asturianos ye l'asignatura pendiente del Conceyu Abiertu.

Nesti sentíu, dende la Xunta Pola Defensa de la Llingua dicen que nes reuniones preparatories vieno xente en representación del PP y militantes del PSOE, anque de momentu entovía nun se cuenta coles firmes d'estes dos organizaciones.

La que sí que firmó yá la iniciativa foi Izquierda Xunida, primer gran partú asturianu n'amestase a la plataforma na que yá taba'l Bloque por Asturies, compañeru de convivencia política de la coalición que dirixe Jesús Iglesias.

Xunta too esto los representantes de la Xunta nel actu desplicaron les primeres llinies d'actuación del Conceyu Abiertu, que, como yá adelantó Asturies.com, va desarrollar una llinia de trabayu de concienciación social y espardimientu del significáu de la declaración d'oficialida del asturianu y los sos valores positivos pa la sociedá asturiana. Xunta esto, la llinia reivindicativa tampoco nun va dexase de llau, anque lo que más alegra a los promotores del Conceyu Abiertu ye que esta vegada hai tiempu abondu pa planificar toles actuaciones y campañes a desarrollar, en cuantes que la reforma del estatutu ta entovía nuna fase previa y nun se trabaya contra'l tiempu como pasare nes movilizaciones previes a la reforma de 1.998.

Lo que tampoco nun se-yos escapa a los responsables del conceyu Abiertu ye qu'esta ye una oportunidá única que nun pue dexase escapar. La oficialidá ye pal Conceyu Abiertu la única ferramienta llegal que pue garantizar el respetu a los derechos de los asturianos y la supervivencia de la llingua nun momentu en que nun se respeten los derechos de los falantes y se caltién el desequilibriu llingüísticu al favor del castellanu.

Tres de la presentación oficial, el Conceyu Abiertu va facer una espicha popular el prósimu día 9 de xunetu en Llagar de Quelo, en Tiñana-Siero. Les entraes yá tan a la vienda.

Per otra parte, la plataforma "Ensame Pola Oficialidá" que nun participa del procesu del Conceyu Abiertu, aprovechó'l día d'ayeri pa presentar na Xunta Xeneral del Principáu una propuesta d'ellaboración propia na que se solicita'l reconocimientu d'oficialidá nel estatutu