Selmana de les Lletres Asturianes

El comité del Descensu del Seya abre una investigación por una manipulación de los cepos

|
El comité del Descensu del Seya abre una investigación por una manipulación de los cepos

El fechu de qu’un grupu de competidores cabeces de serie del LXXXI Descensu Internacional del Seya salieren enantes de tiempu, dalgo que se pue probar por videos de la salida, llevó al comité organizador a abrir una investigación. Afirma que los cepos foron manipulaos, ganando los palistes unos cinco segundos de tiempu.

La salida de la gran prueba piragüística que xune Les Arriondes y Ribeseya siempre tien llugar tres la interpretación del himnu d’Asturies por parte d’autoridaes y públicu, pero los habituales presentes decatáronse qu’esti añu se fixo mientres se cantaba’l ‘Asturies, patria querida’. La razón foi la decisión del responsable de dar la salida de facelo al ver cómo de sópitu un bloque de cepos s’abrieren y los piragüistes tomaran direición al ríu.

Esta escena pudo ser revisada por imáxenes grabaes polos cientos d’aficionaos que s’axunten pa presenciar la salida y llevó al Comité Organizador del Descensu Internacional del Seya (CODIS) a emitir un comunicáu nel qu’espresa que “tres l’apertura con anticipación del cepu 4 de la salida onde taben ubicaes parte de los K-2 senior home y parte de los K-1 senior cabeces de serie, el CODIS inició una investigación comprobando dalgunos vídeos de la salida que muestren evidencies d’un sabotaxe. Tán estudiándose les midíes a tomar”.

Según les primeres informaciones, dos homes con gorra tuvieron agachaos tres estos cepos y, supuestamente, manipuláronlos pa que dalgún de los palistes d’esti cepu salieren enantes que’l restu y garraran posición nel ríu, dalgo clave na prueba. La ventaya que pudieron recibir foi d’unos cinco segundos.

Segunda polémica d’esta edición

Ésta ye la segunda polémica qu’envuelve a la edición númberu 81 del Descensu Internacional del Seya, tres l’atayu que tomó Óscar Santos, ganador en C-1, cambiando a otra canoa que tenía escondida tres la vexetación según dalgunos testigos, dalgo que’l salmantinu niega. Tres les denuncies de los competidores, el CODIS descalificólu y abandonó’l so club, l’Oviedo Kayak, por pidimientu de los sos responsables.

Contador Estadistiques